Кинескиот производител на батерии „Ес волт“ (SVolt Energy Technology Co) сака да го прошири своето присуство во Европа дури со пет фабрики, а преговорите за снабдување на производителите на автомобили во регионот се во тек.
„Ес волт“ веќе има две локации во Германија со еден објект, кој треба да започне со снабдување на „Стелантис“ (Stellantis NV) од 2025 година. Компанијата цели на производствен капацитет од најмалку 50 гигават-часа во Европа до крајот на декадата, информира директорот на „Ес волт“ за Европа, Каи-Уве Воленхаупт. Тоа е доволно за напојување дури еден милион електрични возила.
„Индустријата на батерии во Европа навистина се развива. Би можеле да ги развиеме нашите локации уште побрзо доколку имаме на располагање повеќе ресурси како земја и квалификувани работници“, рече Воленхаупт во интервјуто.
„Ес волт“, која е прв снабдувач на БМВ (BMW), е во преговори со неколку европски производители на автомобили за договори за снабдување со батерии, а се очекува три од договорите да бидат склучени до средината на годината.
Очекувањата се дека кинеските компании ќе доминираат во производството на батерии во Европа. Најголемиот светски производител на ќелии, „Амперекс“ (Contemporary Amperex Technology Co. Ltd) оваа година започна со производство во својата прва европска фабрика во источна Германија, а се проширува со фабрика вредна 7,3 милијарди евра (8 милијарди долари) во Унгарија, со „Мерцедес“ (Mercedes-Benz AG) и „Фолксваген“ (Volkswagen AG) меѓу клиентите. „Енвижн“ (Envision AESC), исто така во кинеска сопственост, планира да изгради погони за батерии во Шпанија и Франција, а ЕВЕ (EVE Energy Co), вториот снабдувач на БМВ за ќелии произведени во Европа, купи земјиште во Унгарија.
„Ес волт“ моментално гради фабрика од 12 гигавати во Бранденбург, откако до 2027 година ја одложи работата на фабриката во Сарланд, вредна 2 милијарди евра (2,2 милијарди долари), поради локалните протести. Воленхаупт истакна дека компанијата останува посветена на плановите во Сарланд. Стратегијата на „Ес волт“ е насочена кон помали производствени погони, кои помалку ги трошат локалните ресурси.
„Ние не сме љубители на огромни фабрики, бидејќи областите што нудат доволно индустриско земјиште честопати немаат квалификувани работници. Покрај тоа, потрошувачката на вода е значителна, што може да создаде реакции во јавноста“, рече тој.
Компанијата разгледува локации во Источна, Северна и Западна Европа со една поголема локација, со капацитет од 20 гигавати. „Ес волт“ објави дека планира во ноември да излезе на шангајската берза за технологија, СТАР (STAR) за да собере дури 15 милијарди јуани (2,2 милијарди долари).
.webp){kind=icon}
