Во Тетовско почна со работа нова фабрика на повратници од странство

Денеска започна со работа фабриката на компанијата „Мултипарк Изаири“ за производство на чист бакар, бакарни жици и бакарни цевки во тетовско Камењане.

„Речиси две години траеше инвестицискиот проект, каде што најпрво се инвестираше во земјиште и капацитети, потоа во производствена линија и во обука на персоналот. Компанијата првично ќе се занимава со производство на бакарни жици со пречник од 8 до 25 милиметри, производ што се употребува во индустриите поврзани со електрична енергија и енергија. Досегашната инвестиција достигна околу 3,2 милиони евра, а стратегискиот план е да се продолжи понатаму со дополнителни инвестиции. Производствениот капацитет зависи од видот и дијаметарот на жицата што се произведува, но просекот е некаде околу 5.000 тони годишно според сегашниот капацитет. Благодарение на поддршката од локалната и централната власт, успеавме да имаме фабрика во Северна Македонија со исти услови како во Германија“, истакна на отворањето Љумни Ајвази, директор на „Мултипарк Изаири“.

Инвеститорите, кои се повратници од странство, користат поддршка од државниот буџет во согласност со Законот за финансиска поддршка на инвестиции.

Министерот за економија Крешник Бектеши потсети дека секоја инвестиција на иселеник во земјава ќе биде поддржана до еден милион евра неповратни буџетски средства.

„За привлекување странски инвестиции, не само од компании што имаат странска сопственост туку и од нашите сонародници што живеат во странство, со најновите законски измени, секоја инвестиција што ќе се случи во Северна Македонија од кој било иселеник што работел и дејствувал во дијаспората претходните пет години ќе се поддржи со дополнителни 15 отсто“, рече Бектеши.

МИА

 

Вицепремиерот за економски прашања Фатмир Битиќи рече дека ова е најголема финансиска поддршка што некоја влада ја дала за инвестиција на локална компанија.

„Поддршката на Владата, која преку Законот за финансиска поддршка на инвестициите ја поддржува оваа компанија, е показател за успешните економски политики на земјата и создава поволна клима за компаниите, стимулирајќи ги да влезат во нови инвестициски циклуси. 'Мутлипарк Изаири' во 2021 година го потпиша договорот за инвестициска финансиска помош, а само за инвестицискиот циклус од таа година компанијата доби државна финансиска помош од 47 милиони денари, која ќе продолжи до крајот на нивниот проект“, рече Битиќи, напоменувајќи дека како влада работат за рамноправен регионален развој, но добро било да се нагласи дека ова е ретка компанија што е реализирана со дијаспората. 

Според раководството на фабриката, за почетниот капацитет се потребни само осум работници во производствениот сектор, кои ќе се грижат за надзор и одржување на производствената линија. Понатаму бројката на вработени ќе достигне 15, со проширување на капацитетот.