Илон Маск, кој се пресели во Тексас за време на пандемијата, планира да основа универзитет во Остин, според даночните пријави за најновата добротворна организација на милијардерот наречена „Фаундејшн“ (The Foundation).
Новата институција, стартувана со подарок од околу 100 милиони долари од Маск, ќе започне со основно и средно училиште фокусирано на наука, технологија, инженеринг и математика (англ. science, technology, engineering, and math / STEМ). Откако ќе профункционира тоа, „крајната намера е операциите да се прошират и да се формира универзитет посветен на образование на највисоко ниво“, се наведува во апликацијата во која „Блумберг“ имал увид.
Универзитетот ќе вработува „искусен кадар“ и ќе има традиционална наставна програма „заедно со практично искуство во учењето, вклучувајќи симулации, студии на случај, проекти за изработка/дизајн и лаборатории“, се истакнува во поднесокот од октомври 2022 година, а одобрен во март. Ќе се бара акредитација од Комисијата за колеџи на Јужната асоцијација на колеџи и училишта.
Претставници на Маск не одговорија веднаш на барањата за коментар.
Ова не е првпат Маск (52) да отвора училиште или да изрази интерес за отворање универзитет. Пред околу една деценија, коосновачот на „Тесла“ (Tesla Inc.) го создаде „Ад астра“ (Ad Astra) во кампусот на „Спејс екс“ (SpaceX) во Калифорнија за неговите пет деца и неколку деца на вработени во неговата вселенска компанија. Кога Маск се пресели во Тексас во 2020 година, училиштето исто така се пресели.
Домот на главниот кампус на Универзитетот во Тексас, Остин, стана жариште на иновации во високото образование. Универзитетот во Остин, лансиран пред две години како алтернатива на традиционалните американски колеџи, се планира да се отвори наесен, со почетна класа од 100 студенти. Институцијата е поддржана од истакнати луѓе во академијата и финансиите, вклучувајќи ги и историчарот Ниал Фергусон, поранешниот министер за финансии Лери Самерс и капиталистот Џо Лонсдејл, кои собраа околу 200 милиони долари во приватни донации.
Новото училиште СТЕМ на Маск очекува почетна класа од 50 ученици и бара да вработи извршен директор, наставник и администратор, се наведува во апликацијата. Повереници на „Фаундејшн“ се Џаред Бирчал, шеф на семејната канцеларија на Маск, Стивен Чидестер, даночен адвокат во „Вајтерс“ (Withersworldwide) и Роналд Гонг и Тереза Холанд, кои работат во „Каталист“ (Catalyst Family Office) во Калифорнија.
Маск, најбогатиот човек на светот со нето богатство од 220,8 милијарди долари, според индексот на милијардери на „Блумберг“, исто така создава свој град надвор од Остин, со рекреативни објекти, училиште и субвенционирани станови за вработените во „Тесла“, „Спејс екс“ (SpaceX) и „Боринг“ (Boring Co), објави „Волстрит журнал“ (Wall Street Journal) во март. Доколку биде одобрена, општината ќе окупира илјадници хектари што тој ги има набавено во последните години.
.webp){kind=icon}
