Најголемиот европски одбранбен фонд ќе обезбеди 500 милиони евра за стартапи

Германскиот инвеститор „Диџитал трансформејшн капитал партнерс“ - ДТКП (Digital Transformation Capital Partners GmbH - DTCP) е на добар пат да го собере најголемиот фонд за ризичен капитал во Европа досега, наменет за стартапи од областа на одбраната, потпишувајќи ги своите први големи поддржувачи за фондот, чија цел е 500 милиони евра.

ДТКП, кој пред една деценија се одвои од „Дојче телеком“ (Deutsche Telekom AG), ги затвори инвестициите од своите главни поддржувачи, изјави за „Блумберг њуз“ (Bloomberg News) управувачкиот партнер Томас Пројс. Тој потврди дека ДТКП на крајот ќе се фокусира на 500 милиони евра за фондот.

 

„Порше аутомобил“ (Porsche Automobil Holding SE), холдинг компанијата на милијардерските семејства Порше и Пих, и „Дојче телеком“ беа во преговори за основање на новиот фонд, објави „Блумберг“ во август.

Двете компании чекаат одобрение за учество помеѓу 25,1 и 49,9 отсто во фондот за одбрана регистриран во Луксембург, според декемвриските поднесоци до германскиот регулатор за пазарна конкуренција.

Со целосната инвазија на Украина од страна на Русија и колебливата поддршка на американскиот претседател Доналд Трамп за НАТО, европските влади ги зголемија воените трошоци до рекордно високо ниво. Основачите и инвеститорите на стартапи се обидоа да го искористат тој бум, а новите фирми за одбрана, како што е производителот на дронови „Хелсинг“ (Helsing), постигнуваат процени од повеќе милијарди долари.

Ако ДТКП ја достигне својата цел, тоа ќе биде најголемиот фонд за одбрана за стартапи во Европа. Француската државна банка „Бпифранс“ (Bpifrance) и холандската фирма „Кин венчр партнерс“ (Keen Venture Partners) собираат помали средства за целниот сектор, како и основачот и инвеститор на „Лејкстар“ (Lakestar), Клаус Хомелс, објави „Блумберг њуз“.

ДТКП планира да направи околу 30 инвестиции од новиот фонд, со просечна големина на чек од 20 милиони евра, рече Пројс. Тимот ќе ја разгледа европската дигитална одбранбена инфраструктура и ќе инвестира во стартапи што иновираат во синџири на снабдување, поврзување, центри за податоци, материјали, роботика, сајбер-безбедност и беспилотни системи, рече тој.

Фирмата планира околу една петтина од инвестициите од новиот фонд да се фокусираат исклучиво на воени технологии што може да вклучуваат системи за оружје. Остатокот ќе биде таканаречена двојна употреба со цивилни и одбранбени апликации.

Тоа покажува промена на ставот од менаџерите на фондови и нивните инвеститори, кои претходно избегнуваа да финансираат вооружување.