.webp){kind=icon}
Претседателот на Управниот одбор на „Макпетрол АД Скопје“, Андреја Јосифовски, ја доби престижната Голема награда со златна лента и признание за животно дело „Креатори на векови“ за исклучителни постигнувања и развој на претприемништвото на подрачјето на Средна и Југоисточна Европа, информираат од компанијата.
Андреја Јосифовски, претседател на УО на Макпетрол АД Скопје
Наградата беше доделена на Регионалниот самит на претприемачи од Средна и Југоисточна Европа „300 најдобри“ што годинава по осми пат се одржа во Дубровник во Хрватска.
„Признанието за животно дело доаѓа во годината кога „Макпетрол“ одбележува 75 години од основањето на компанијата, период во кој Јосифовски има исклучително значајна улога во издигнувањето на нафтената компанија од локална приказна до еден од најуспешните и најпрепознатливите брендови во регионот и пошироко“, пишува во соопштението од Макпетрол.
За наградите за животно дело одлучуваат професионалци од областа на економијата, финансискиот сектор и маркетингот од 10 земји.
„Исклучително сум почестен и горд што еминентни имиња од претприемништвото одлучија да ми го доделат ова многу значајно признание. „Макпетрол“ е компанија која има оставено траен белег во мојот професионален живот, но истовремено има силно влијание врз развојот на целокупната економија во Македонија и во поширокиот регион. За мене оваа награда е признание дека регионот ги препознава и вреднува нашите заложби да изградиме и одржиме компанија со јасна визија и цел, посветена на развојот и технолошките иновации со особено внимание на заштитата на животната средина и континуирана поддршка на локалната заедница. Така создаваме поголеми можности за развој на целото општество“, вели Андреја Јосифовски, претседател на Управниот одбор на Макпетрол АД Скопје.
