Враќање во иднината: како ќе работиме во 2023 година

Како ќе изгледа работното место за една година? Снежната кристална топка во однос на работата е разнишана до темел од почетокот на пандемијата. А вителот уште не е смирен. Сепак, едно е јасно: претпоставката дека канцеларискиот живот може да се врати на она што беше пред 2020 година е едноставно погрешна.

Тројца од четворица работници велат дека хибридниот работен модел е нешто за што не може ни да се преговара. Во 2023 година се очекува своевидно враќање во канцелариите, но организирано на сосема поинаков начин. Издвојуваме три предвидувања за поздраво, посреќно и попродуктивно работно место.

Крај на „флекс-шејмингот“ (Flex-Shaming)

На почетокот на 2022 година, британската експертка за човечки ресурси Џема Дејл ја измисли фразата „flex-shaming“ во објава на Линкдин (LinkedIn). Таа добро го покажува ниското ниво на доверба што некои лидери во компаниите им го даваат на работниците што физички не се присутни во канцелариите. Меѓу најпознатите е Дејвид Соломон од „Голдман Сакс“, кој работењето од дома во 2021 година го нарече „аберација што ќе ја исправиме што е можно поскоро“. Во октомври, Соломон за Си-ен-би-си изјави дека околу 75 проценти од неговите луѓе биле во канцеларија во кој било ден од неделата пред пандемијата, а тогаш тоа ниво го процени на околу 65 проценти. Дури и ако шефовите мислат дека можат да ја наметнат својата волја, законските промени низ светот сега фаворизираат флексибилност.

Повеќе од милијарда луѓе од Грција до Тајланд веќе се опфатени со законски измени што имаат цел да ја олеснат хибридната односно работата од далечина. Важно е да се создаде култура на доверба и транспарентност меѓу шефовите и вработените за да се дојде до решенија, не преку сувопарна политика, туку со меѓусебен договор. Во 2023 година нема простор за обвинувања против вработените.

Омекнување на острите рабови на хибридната работа

Сето горенаведено не значи дека хибридната работа е лесна. Неодамна објавени податоци од консултантската компанија за недвижности JLL покажуваат дека одвојувањето на канцеларијата и домот е голем проблем. Приближно 25 отсто од хибридната работна сила се чувствуваат изолирано од општеството, а 59 отсто очекуваат грижа за нивното здравје и благосостојба каде и да работат. Загриженоста околу социјалната кохезија и продуктивноста во хибридните канцеларии расте: Марк Бениоф, основач и извршен директор на технолошката компанија „Сејлсфорс“ (Salesforce Inc.), кој исто така е член на одборот на Светскиот економски форум, неодамна изјави дека новите вработени не биле доволно продуктивни и праша: „Зарем сега не градиме племенско знаење со нови вработувања без канцелариска култура?“

Џоана Свош, управна директорка на „Манипени“ (Moneypenny), која изгради паб во средиштето во Врексам, Велс, за да го направи својот канцелариски простор што е можно попривлечен, во поткастот Bloomberg Nowhere Office рече дека таа е голем поддржувач на канцелариите, но исто така силно верува оти секаде каде што некој работи, тоа мора да биде вистинска средина за него.

Говорејќи неодамна на Global Drucker Forum во Виена, Фрауке фон Полие од германската производствена групација „Вајсман“ (Viessmann), избрана за најдобар менаџер за човечки ресурси во Европа во 2022 година, рече дека правењето промени што би траеле само три месеци или дури една година треба да стане нормално додека се смират работите.

Работното место како социјален простор

Во една неодамнешна објава на Линкдин, Фон Полие напиша: „Како да се осигурите дека вашата култура е зајакната? Па, почнувате од врвот и им служите храна на луѓето... и секако десертот мора да биде бесплатен!“

Откако се приклучив на Bloomberg Work Shift како соработник, често доаѓам во канцеларијата во Лондон за да се видам со колегите. Лифтот застанува на катот каде што е „шпајзот“, место каде што грицките, топлите пијалаци и луѓето се среќаваат лице в лице пред да се префрлат на своите бироа или во собите за состаноци.

Иако податоците покажуваат дека 84 проценти од намалувањето на канцеларискиот простор е поврзано со хибридната работа, пренамената на канцелариите да бидат посоцијални, плус инвестициите во работното искуство, расте. Истражувањето за расположението на закупците во канцелариите во САД од страна на фирмата за недвижности CBRE покажува дека 36 отсто од извршните директори ги негуваат искуствата и настаните на работното место како дел од својата стратегија за создавање заедница и зголемување на присуството во канцелариите. Очекувам тој процент да расте. На луѓето им треба причина да дојдат до место што ја надминува мобилната технологија, до која, пак, можат да пристапат од секаде. Таа причина е едноставна: други луѓе.

Додека основата на работната снежна топка се префрла од место на личност, сите ние мора да работиме и да се сретнеме некаде. Се надеваме дека 2023-та ќе биде година во која канцелариите ќе се вратат во нова, подобрена форма.