Банките од Волстрит и европските конкуренти го поништуваат де факто замрзнувањето на вработувањата по итното спасување на „Кредит Суис“ (Credit Suisse Group AG) од страна на УБС (UBS Group AG), не можејќи да одолеат на мамката за врвните таленти достапни со попуст.
Компании како „Дојче банк“ (Deutsche Bank AG), „Ситигруп“ (Citigroup Inc) и „ЏП Морган Чејс“ (JPMorgan Chase & Co) се подготвени да вработат некои од инвестициските банкари и менаџери на имоти од швајцарската фирма, велат лица запознаени со ова прашање. Разговорите започнуваат во Њујорк и Лондон, а некои ловци летаат дури и во Цирих на состаноци, велат изворите.
Додека ударните бранови од колапсот на „Кредит Суис“ сè уште одекнуваат низ пазарите, во некои банки наративот се префрли од зараза кон можности што се нудат еднаш во деценијата. Првата итна продажба на голема банка по финансиската криза им дава шанса на ривалите да го соберат клучниот персонал или бизнисите што инаку не би биле понудени. Тоа го враќа во акција пазарот на таленти, кој пред неколку недели главно беше обележен со кратења на работните места и прекин или намалување на вработувањата. Голем дел од интересот доаѓа од вработените во „Кредит Суис“ и додека фирмата веќе забележа егзодус на врвни банкари во последните две години, ривалите сè уште гледаат многу достојни кандидати меѓу околу 50.000 вработени. УБС може да има предност за ѕвездите што сака да ги задржи околу себе.
„Има многу талентирани инвестициски банкари што активно се регрутираат. Многу од луѓето на 'Кредит Суис' сфаќаат дека УБС има помал бизнис и франшиза на банкарство низ финансиските и советодавни бизниси, па се обраќаат до други компании во врска со потенцијални места“, рече Мајкл Нелсон, управен директор во фирмата за регрутирање „Квест“ (Quest Group) во Њујорк.
„’Дојче банк’, најголемиот европски играч со фиксен приход, внимателно го разгледува вработувањето откако УБС сигнализираше дека ќе го затвори бизнисот за тргување со долгови на ’Кредит Суис’“, велат нашите извори, барајќи да не бидат идентификувани бидејќи плановите се приватни.
Претседателот на УБС, Колм Келехер, говорејќи на прес-конференција во неделата, беше јасен во своите намери за инвестициската банка „Кредит Суис“.
„Единицата ќе биде намалена и усогласена со нашата конзервативна култура за ризик“, рече тој, додавајќи дека УБС ќе го намали ризикот од многу незгодни бизниси што ги наследуваат.
Претставниците на банките одбија да коментираат.
Спасувањето го доведува во прашање разграничувањето на инвестициското банкарство на „Кредит Суис“ во единицата „Фрст Бостон“ (First Boston), која е под водство на Мајкл Клајн. УБС не сака да продолжи со тие планови и наместо тоа може да ги избере најдобрите трговци, рекоа лицата што нè информираат за случувањата.
Несигурноста најверојатно ќе влијае на вработувањата, бидејќи некои банкари мигрираат наместо да чекаат да видат дали ќе бидат дел од кратењата во УБС. Други можеби не сакаат да им се приклучат на тие што до неодамна беа најголем ривал на банката за која работеа, или претпочитаат да му се приклучат на конкурент што има поголеми операции во инвестициско банкарство.
Главниот извршен директор на УБС, Ралф Хамерс, оваа недела изјави дека околу шест милијарди долари од планираните осум милијарди долари заштеда на трошоците ќе дојдат токму од кратење на персоналот.
Колапсот на „Кредит Суис“ дава нов пресврт на веќе нестабилниот пазар за вработување на банките. За време на пандемијата, тие започнаа војна за таленти, бидејќи побарувачката за склучување зделки и финансирање се зголеми, за потоа активноста да забави, бидејќи ФЕД почна да ги зголемува стапките. „Голдман Сакс“ и „Морган Стенли“ се меѓу фирмите што неодамна ги објавија плановите за намалување на работните места.
Фирмите за лов на глави што работат со банки, вклучувајќи ја и „Голдман Сакс“, веќе почнаа да превезуваат претставници во Цирих за да разговараат со кандидатите, според еден од изворите со директно познавање на ова прашање. Заемодавците како ХСВЦ (HSBC Holdings Plc) и „ЏП Морган“ (JPMorgan), како и други европски и швајцарски приватни банки, се заинтересирани за врвните банкари или дури и цели тимови, велат изворите.
Некои фирми бараат повеќе од само банкари што имаат клучни односи со клиентите, на пример специјалисти за инвестиции што помагаат да се структурираат комплицирани трансакции и инвестициски производи за богатите клиенти, рече едно лице.
Преземањето на „Кредит Суис“ за само дел од пазарна вредност на банката и интервенцијата од страна на владата направија голем дел од работите да бидат речиси безвредни. На „Кредит Суис“ во вторникот швајцарската влада му нареди да ги замрзне одложените бонуси, што им нанесе дополнителна болка на банкарите, кои веќе увиделе дека вредноста на нивните награди е многу намалена поради падот на акциите.
УБС уште може на многумина да им даде причини да останат, особено во секторите каде што сака да се прошири. Кога ја објави трансакцијата поддржана од швајцарската влада, Хамерс рече дека комбинацијата со „Кредит Суис“ ги поддржува амбициите за раст на компанијата во управувањето со имоти во Америка и Азија. Комбинацијата на двете банки создава гигант за управување со богатство со околу пет илјади милијарди долари инвестирани средства.
.webp){kind=icon}
