Како до вработување? Личните контакти повторно се поважни од совршено CV

Регрутерите се соочуваат со проблем што можеби некогаш го посакувале: секое CV е совршено. Алатките за вештачка интелигенција (ВИ) им овозможија на кандидатите лесно да испраќаат беспрекорно средени пријави за работа, па работодавачите повторно посегнуваат по традиционалните методи за меѓу кандидатите да ги пронајдат најдобрите.

Посредувањето на вештачката интелигенција при пишувањето и уредувањето на биографиите доведе до тоа компаниите да бидат преплавени со многу слични пријави, наведуваат неколку регрутери. Поради тоа, работодавачите сè повеќе се потпираат на методи како тестирање во живо, вмрежување и препораки за да ги проценат потенцијалните вработени.

„Вмрежувањето отсекогаш било важно. Сега е апсолутно пресудно“, вели Зои Меклафлин, извршна директорка на центарот за кариера на ЛБС (London Business School). „Ако тоа е работа што навистина ја сакате, најмалку едно лице во компанијата треба да го знае вашето име пред да се пријавите.“

Кандидатите имаат над три пати поголеми шанси да бидат вработени од компанија ако веќе се поврзани со еден од нејзините вработени пред да аплицираат | Depositphotos

Забрзаното усвојување на вештачката интелигенција истовремено предизвикува сè поголема загриженост меѓу кандидатите, кои се прашуваат дали оваа технологија целосно ќе елиминира одредени работни места, па дури и цели кариери. Како што сè повеќе компании ги автоматизираат сопствените процеси на пријавување и вработување, многу кандидати користат ВИ за масовно да се пријавуваат за работни места или брзо да го приспособуваат своето искуство на конкретните описи на работните места - сè со обид да направат совршено CV.

Околу 84 отсто од кандидатите кои се пријавуваат за почетни позиции во финансискиот сектор користат ВИ алатки при подготовката на пријавите или одговорите за интервју за работа, покажува извештајот на лондонскиот стартап АМ (AmplifyME), кој развива симулации и технологија за обука на дипломирани студенти кои бараат работа во финансиите.

За кандидатите, тоа носи ризик работодавачот да препознае дека CV-то е направено со помош на ВИ и да ја отфрли пријавата токму поради тоа. За работодавачите, од друга страна, станува сè потешко врз основа на пријавата да проценат кој навистина би можел успешно да ја извршува работата.

Постојат одредени знаци кои можат да откријат CV напишано со помош на вештачка интелигенција, вели Ребека Сицилијано, генерална директорка на компанијата ТР (Tiger Recruitment). Меѓу нив се американскиот правопис, задебелувањето на одредени зборови и прекумерната употреба на фрази како „докажани резултати“ (proven track record ако испраќате CV на англиски) или „десна рака од најголема доверба“ (trusted right hand).

Може ли проширувањето на мрежата на познаници да биде поважно од самото CV? |  Depositphotos

„Често постои преголемо потпирање на описен јазик наместо на конкретни, мерливи достигнувања, додека форматирањето кај различни кандидати може да изгледа необично унифицирано“, вели Сицилијано. „Бараме докази за тоа што некој навистина постигнал.“

Таа додава дека сè повеќе компании се потпираат на вмрежување и тестови во живо кои кандидатите мора да ги направат во ограничено време.

Податоците што ги собрал Линкдин покажуваат дека една третина од припадниците на генерацијата зед сметаат дека недостатокот од соодветна мрежа на контакти е најголемата пречка за добивање на првата работа. На глобално ниво, кандидатите имаат над трипати поголеми шанси некоја компанија да ги вработи ако пред пријавувањето веќе се поврзани со некого од нејзините вработени, според податоците на Линкдин.

„Личното вмрежување е во пораст, како и присуството на деловни собири“, вели Ендрју Пауел, главен комерцијален директор на компанијата за вработување РВ (Robert Walters). „Додека светот на вештачката интелигенција ќе создава сè поголема сличност, човечкиот пристап станува сè поважен.“

Работодавачите затоа се насочуваат кон компании како АМ (AmplifyME) за полесно да го филтрираат огромниот број пријави. Таа компанија бележи раст на бројот на работодавачи кои ги бараат нејзините услуги за процена на кандидати.

„Стана речиси невозможно да се раздвои сигналот од бучавата“, вели Ентони Чеунг, директор за содржина и култура во АМ (AmplifyME).

„Тоа создава побарувачка за процени кои повеќе се засноваат на реалниот учинок, каде што работодавачите можат да видат што кандидатот навистина умее да направи, наместо да се потпираат исклучиво на CV-то или пријавата.