Огласи за Македонци: Во „Мекдоналдс“ за 900 евра, бравари за 2.600 евра

Стотици огласи за вработување, некои постојано актуелни, а некои сезонски поатрактивни. Се бараат речиси сите стручни квалификувани профили на работници, но традиционално, пред летото, особено се актуелни огласите за работа во угостителство и хотелиерство. Но трендовите се менуваат. Анализирајќи ги огласите за работа, наидовме на повеќе огласи за постојано вработување во странство, не само за сезонска работа. Очигледно проблемот со работници не е привремен и не е само во нашата земја.

Прашавме кои се успешни огласи. Како треба да изгледаат? Кои професии се најбарани? Направивме преглед на актуелните објави за барани работници, а одговори побаравме и од сопственици на агенции посредници за вработување.

На работа во „Мекдоналдс“ во Хрватска за 900 евра

Еден од поинтересните огласи за вработување, кој ни го привлече вниманието, е за работа во „Мекдоналдс“ во Хрватска. Се бараат работници за нето-плата од 900 евра за почетно работно место, со обезбедено сместување на сметка на работодавецот и превоз до и од работа. Компанијата нуди можност за постојано вработување, не само сезонски, а предвидени се и обуки за тие што немаат соодветно искуство.

„Вработување.ком“

 

Се бараат и различен тип на работници за компанија во Обединетите Арапски Емирати, со можност за работа оддома, но без наведени детали околу привилегиите и погодностите за вработените.

За во Италија се бараат заварувачи и бравари со искуство за плата од 12 евра за час со обезбеден престој. Тоа на месечно ниво, според написот во огласот, би значело плата меѓу 2.200 и 2.600 евра.

„Вработување.ком“

 

За во Бугарија се бараат повеќе различни профили угостителски работници за сезонска работа во период од три до девет месеци, со тоа што во огласот пишува дека работниците добиваат сместување и храна, но без информација за конкретната плата. Сепак, има и такви што транспарентно ја пишуваат можната заработка, па ќе наидете на отворени огласи за келнери во Бугарија за плата од пет евра на час, односно околу 1.000 евра месечно, со обезбедено сместување.

„Вработување.ком“

 

„Огласите за работа во странство или во странски компании кај нас се секогаш поатрактивни за барателите за работа“, вели Дарко Велков, основач и директор на „Вработување.ком“, кој веќе 19 години работи како посредник на пазарот на трудот.

„Секако дека странските компании и сите нови инвеститори многу повеќе привлекуваат апликанти. И во Македонија да дојде нов клиент е многу поатрактивен за пазарот на трудот. Ние сме дел од регионална компанија што работи во регионот Адрија и пошироко, па затоа кај нас се редовни огласите за работа во странство. Гледаме да работиме со еминентни фирми“, вели Велков.

Во прилог на ова оди и фактот што „Вработување.ком“ во средата ја одбра компанијата најпосетуван огласувач за годинава, а тоа е „Лидл“. Велков вели дека интересот за оваа компанија е огромен, и тоа во услови кога уште официјално нема свој објект ниту отворен маркет.

Кај нас се бараат сите стручни профили на работници

Искуството на Велков покажува дека традиционално, пред почетокот на летната сезона, изобилуваат огласи за вработување во услужните сектори.

„Моментално, како што наближува сезоната, гледам дека се отвораат многу огласи на фирми и институции, особено во секторот угостителство и хотелски комплекси. Секако, постојат и стандардно актуелни огласи за ИТ-кадар, за продажба, менаџерски позиции итн. Но, главно, најактуелни се огласите поради зголемен обем на работа во големите комплекси и хотели“, вели Дарко Велков.

Дарко Велков, основач и директор на „Вработување.ком“ Фото: Приватна архива

 

Меѓу најбараните работници дефинитивно се стручно квалификуваните кадри, кои се бараат и во земјава, но и во странство.

Тоа го потврдува и директорот на агенцијата за привремени вработувања „Партнер“, Раде Ненадиќ, кој вели дека покрај работници во угостителството, постојно се бараат и на македонскиот пазар на трудот има сериозен недостиг од стручни кадри.

„Има недостиг од сè што е средна стручна спрема, од сите стручни профили, почнувајќи од готвачи и келнери, па гипсари, столари, бравари и сите други такви професии. Тоа секогаш било така, но сега е поизразено и сè повеќе ќе биде така. Ситуацијата е повеќе од лоша“, вели Ненадиќ.

Секако, во последно време често се актуелни и огласи за работа во центри за корисничка поддршка или телефонска промоција и продажба на производи, кои доколку се извршуваат за странски компании како „аутсорсинг“, тогаш се многу поплатени, затоа што се извршуваат на конкретните странски јазици, а не на македонски јазик.

Бараме големо искуство, нудиме конкурентна и редовна плата

Интересен е фактот дека многу од огласите имаат цела листа на вештини и квалификации што апликантот треба да ги поседува за да биде конкурентен за работното место, додека за условите што ги нуди компанијата информациите често се општи и штури. На пример, има компании што во опцијата „што нудиме“ набројуваат редовни месечни примања, регрес за годишен одмор или дополнителна платена прекувремена работа, нешта што се задолжителни според законот и не се сметаат за конкурентна предност на компанијата. Често наидуваме и на опис за работното место од типот: „нудиме пријатна работна атмосфера“ или „конкурентна плата“.

„Тоа е наш менталитет, менталитет на луѓето што ги водат човечките ресурси. За жал, често станува збор за големи меѓународни компании. Дури и некои работилници објавуваат повеќе услови што нудат од големите компании. Едноставно, немаат идеја и визија како се работи тоа. Не е само да се напише што барате од мене како работник, туку и што нудите за да дојдам кај вас. Особено кога станува збор за состојбата со стручните кадри, не може само да ги канат, туку треба да напишат што повеќе нудат од таму каде што сте“, вели Раде Ненадиќ.

Раде Ненадиќ, директор на агенцијата за привремени вработувања „Партнер“  Блумберг Адрија ТВ

 

Неговото искуство со посредување меѓу работодавците и работниците покажува дека најчесто не се реализираат во целост дадените ветувања во огласите за вработување.

„Ќе прочитате едно, а кога ќе одите излегува сосема десетто. Ние не сме имале, немаме, ниту во скоро време ќе имаме реален пазар на труд како во секоја нормална држава, која има берза на трудот каде може да се добијат информации за секого. Кај нас го нема тоа, туку се бара работник со работно искуство од 10 години за плата од 25.000 денари. А, тој ако веќе има толкаво искуство, сигурно веќе работи некаде и нема да оди на друго место за тие пари“, вели Ненадиќ.

За да биде апсурдот поголем, има дури и компании што единствено што наведуваат во огласот е што треба да поседува апликантот и кои му се работните задачи, без притоа да се спомене буквално ниту еден детаљ за обврските на работодавецот. Такви огласи има и за работа во компании во земјава, но и за во странство. Пример е фирма што вработува комерцијалист за големопродажба на нафтени деривати на Косово. И компанија од пекарската индустрија во Словенија бара стручни работници од земјава без детали за условите за работа.

„Вработување.ком“

 

Се бараат собари и хигиеничари за во Црна Гора со обезбедено сместување, превоз и два оброка дневно, но без податоци за висината на платата.

„Ние често ги советуваме компаниите при огласувањето да бидат што попрецизни во напомнувањето на бенефициите за идните вработени, како конкретна плата, дали има приватно здравствено осигурување и сите други дополнителни поволности, а да нема напомени од типот редовни месечни примања, затоа што навистина нема потреба да се спомене тоа. Но секоја компанија има свој стил за тоа и ние не може да се мешаме, тие одбираат што ќе напишат во огласот“, вели нашиот соговорник Дарко Велков.

Познавачите на пазарот на трудот велат дека треба да се забрза новото законско решение за кое се зборува веќе неколку години, а како особено важна ја истакнуваат потребата да се либерализира пазарот на трудот во Македонија, по примерот на развиените европски земји, наместо упорно да се стега и да се заоструваат условите, особено за работодавците.