Рано е за преминување на работа оддома, хибриден модел е идеално решение

Укинувањето на канцелариите и преминувањето на целосна работа оддома нема да се случи во регионот Адрија, а според експертите мали се шансите тоа да се случи и во Европа. Исто така истражувањата покажаа дека многу луѓе веруваат дека работата оддома има негативно влијание врз нивниот напредок во кариерата. Од друга страна, многу вработени тврдат дека се попродуктивни оддома, додека газдите на некои големи компании известуваат дека работниците од далечина уживаат во помал обем на работа.

Доминик Рашкај, маркетинг и пиар-менаџер на порталот boljiposao.com, смета дека целосно укинување на канцеларијата нема да се случи барем во нашиот регион, а мала е можност за тоа и во Европа.

Работата оддома за компаниите носи голем број предизвици, а Рашкај посочува дека за тоа не сме и нема да бидеме целосно подготвени уште долго време. Доколку навистина се случи тоа, тој смета дека тоа може да предизвика голем број проблеми за компаниите – од неефикасност на самиот работник до лоша услуга и неквалитетна работа. Згора на сè, не треба да ги заборавиме новите технологии, особено развојот на вештачката интелигенција (ВИ), поради што понекогаш ќе биде тешко да се одреди колкаво влијание има вештачката интелигенција во извршувањето на работните задачи.

Влијание врз тимовите и меѓусебна соработка

„Компаниите ќе се соочат со загуба на квалитетни клиенти, бидејќи нема да имаат максимални услуги, а тоа е многу ценето во светот на бизнисот денес, кога плаќате за нешто, колку и да чини, сакате врвна услуга“, додава Рашкај.

Работата оддома го отвора и прашањето за влијанието врз динамиката на тимот и меѓусебната соработка. Голем предизвик во случај на работа целосно оддома е одржувањето на корпоративната култура и тимското поврзување. Рашкај наведува дека хибридниот модел на работа е добро решение за да можат тимските состаноци да се одржуваат во живо, особено ако станува збор за проект на кој работат повеќе луѓе.

Лиценцирана фотографија

Тој наведува дека во случаите на работа на големи проекти, вработените што работат на далечина премногу се „опуштаат“, избегнуваат онлајн состаноци, работата оддома се користи за некои други обврски и тука се губи работната навика. Тоа го поткрепуваат резултатите од истражувањето спроведено за „Блумберг њуз“. Додека работат оддома, многу вработени известуваат дека извршуваат повеќе задачи за подобар баланс помеѓу работата и животот.

Bloomberg

Кога станува збор за клучните компетенции потребни за успешна работа оддома, Рашкај ги нагласува стабилноста, фокусираноста, посветеноста и одговорноста, а како најважно нешто – довербата да се дозволи некој да работи на проект без контрола. Голем број лидери наведуваат дека преминот кон хибриден модел на работа донесе предизвик за доверба во вработените и нивната продуктивност.

„Она што сакам да го кажам, без да навредам некого, е дека не можете да му верувате некому прекуноќ. Вработен што само што пристигнал, без одредени години труд и работа, може да има целосна слобода во својата работа и тука се јавуваат проблемите“, нагласува Рашкај.

Напредување во кариерата

Многу вработени не сакаат да работат оддома затоа што се чувствуваат изолирано, се грижат за напредокот во кариерата, не им е удобно на онлајн состаноците и чувствуваат дека не можат да градат односи со колегите.

„Исто така, работата оддома може да резултира со поголем притисок или да доведе до конфузија поради немањето јасна граница помеѓу работното време и времето за одмор, што лесно може да доведе до прекумерна работа и исцрпеност“, изјави социологот Јадранка Бериќ за „Блумберг Адрија“.

Лиценцирана фотографија

Затоа, важно е да се имплементираат стратегии за зачувување на менталното здравје, како што се редовна комуникација со колегите преку виртуелни состаноци, поставување јасни работни часови, промовирање на паузите и на вежбањето и обезбедување пристап до ресурси за ментално здравје, како што се советување и едукација за управување со стресот.

Кога станува збор за напредување во кариерата, постои перцепција дека вработените што редовно одат во канцеларија често се повидливи и имаат поголема можност за унапредување. Тоа може да се должи на почестите интеракции со претпоставените и колегите, како и на поголемото присуство на состаноци и проекти во живо.

„Важно е да се истакне дека продуктивноста и успехот во извршувањето на работните задачи не треба да се условуваат од локацијата на работата. Воведувањето транспарентни процеси на евалуација и унапредување, кои се засноваат на објективни критериуми и резултати од работата, е клучно за обезбедување правичност и еднакви можности за сите вработени, без разлика дали работат оддома или во канцеларија“, нагласува Бериќ.

Она што произлегува како идеално решение, според Рашкај, е комбиниран модел на работа, каде што од понеделник до среда работите од канцеларија, а во четврток и петок оддома, со можен неработен петок, кој се покажал како успешен во некои земји.

„Овој вид на работна организација придонесува за поголема мотивација на вработените“, посочува тој.

Рашкај смета дека трендовите и развојот на технологијата ќе доведат не само до затворање канцеларии туку и работни места, поради сè посилното влијание на вештачката интелигенција, особено во САД, додека во Европа ќе продолжи да преовладува комбинираниот модел на работа, кој ќе се покаже како многу поефикасен и поквалитетен од целосното префрлање на работа оддома.

Според него, проблем ќе биде немањето работници.

„Најновото истражување покажува дека нема доволно работници, особено во производството, а таквата работа – производство, транспорт и маркетинг на производи – не можеме да ја работиме оддома. Квалитетна работа може да се добие со намалена работна недела и работно време, без да се нарушува ритамот на квалитетот на услугите“, заклучува Рашкај.

Во моментов нема коментари за веста. Биди прв да коментира...

Остави коментар