Најголема трансакција на сите времиња: „Опен еј-ај“ со вредност од 852 милијарди по рунда од 122 милијарди долари

„Опен еј-ај“ (OpenAI) склучи договор за собирање 122 милијарди долари од инвеститори при процена од 852 милијарди долари, што ја прави оваа рунда на финансирање убедливо најголема досега и ја засилува неговата скапа стратегија за повеќе чипови, центри за податоци и кадар.

Поголемиот дел од финансирањето, кое се подготвуваше со месеци, дојде од три големи технолошки компании. „Амазон“ (Amazon.com Inc.) се согласи да инвестира 50 милијарди долари, додека „Енвидија“ (Nvidia Corp.) и „Софтбанк“ (SoftBank Group Corp.) вложија по 30 милијарди долари. Голем дел од инвестицијата на „Амазон“, 35 милијарди долари, е условен со тоа „Опен еј-ај“ да излезе на берза или да достигне технолошки праг на општа вештачка интелигенција.

Компанијата, креатор на ЧетГПТ, обезбеди средства и од долг список други значајни инвеститори, меѓу кои „Андрисен Хоровиц“ (Andreessen Horowitz), МГИКС (MGX) од Абу Даби, „Д.Е. Шо“ (D.E. Shaw Ventures), ТПГ (TPG) и ТРП (T. Rowe Price). Процената на компанијата ги вклучува и собраните средства. „Блумберг њуз“ претходно објави детали за разговорите и финансиските услови на договорот.

Финансирањето на „Опен еј-ај“ е, според сите мерки, една од најголемите трансакции во историјата, далеку поголема не само од претходните рунди на финансирање други стартапи со приватна поддршка туку и од аквизиции и иницијални јавни понуди. Тоа ја одразува огромната побарувачка за учество во технологија што се смета за трансформативна не само за компаниите и индустриите туку и за цели економии. Финансирањето ги надмина неодамнешните рунди на ВИ-стартапите „Антропик“ (Anthropic PBC) и „Екс еј-ај“, покажуваат податоците на „Блумберг“.

„Опен еј-ај“ испиша историја со финансирањето

Рундата се вбројува меѓу најголемите трансакции на сите времиња

Bloomberg

„Опен еј-ај“ обезбеди и повеќе од 3 милијарди долари од индивидуални инвеститори преку банкарски канали. Стартапот исто така соопшти дека ќе биде вклучен во повеќе берзански фондови управувани од „Арк инвест“ (Ark Invest) на Кети Вуд, со цел да им се овозможи на повеќе луѓе изложеност на ВИ-компанијата.

Финансиската директорка на „Опен еј-ај“, Сара Фрајер, изјави дека финансирањето „ги надминува дури и најголемите иницијални јавни понуди што некогаш се направени“. Според неа, договорот треба да ѝ даде на компанијата „голема флексибилност“ за вложувања во компјутерски ресурси и во развојната мапа за ВИ, во време на поширока неизвесност на јавните пазари, вклучително и поради војната со Иран.

Развивачот на вештачка интелигенција претходно соопшти дека е посветен на инвестиции од повеќе од 1,4 билион долари во физичка инфраструктура во наредните години за поддршка на својот ВИ-софтвер. За финансирање на тие планови, „Опен еј-ај“ и конкурентот „Антропик“ се потпираат на исти инвеститори инвестициски фондови и технолошки компании, вклучувајќи ги и нивните партнери за облачни услуги и чипови како „Амазон“ и „Енвидија“ (Nvidia Corp.). Сложената мрежа на партнерства предизвика загриженост за последиците доколку технологијата не ги оправда денешните високи очекувања.

Двете стартап-компании се очекува да излезат на берза веќе оваа година, со што ќе обезбедат дополнителен капитал и ќе го тестираат апетитот на Волстрит за нерентабилни, но брзорастечки ВИ-бизниси. Фрајер изјави дека „Опен еј-ај“ треба да биде „подготвена како јавна компанија“, нарекувајќи го тоа „добра практика“ за бизнисот, без да открие конкретни детали за плановите за иницијална јавна понуда. Таа додаде дека ИПО може да биде и „момент на градење доверба“ за компанијата.

„Опен еј-ај“ во вторникот соопшти дека моментално генерира 2 милијарди долари приходи месечно. Компанијата, која стана препознатлива меѓу широката јавност како производ за секојдневни корисници, бележи раст и кај деловните клиенти. Продажбата кон корпоративни клиенти сега учествува со 40 отсто во приходите, со очекување тој удел да достигне 50 отсто до крајот на годината.

Финансиската обврска од „Амазон“ доаѓа и со договор за облачни услуги за хостирање и дистрибуција на моделите на „Опен еј-ај“ за корпоративни клиенти. Партнерството ќе вклучува и договор за поделба на приходи, изјави Фрајер, без да открие износ.

„Опен еј-ај“ годинава го засили растот на приходите со воведување реклами во ЧетГПТ, опција што извршниот директор Сем Алтман претходно ја опиша како „последна опција“. Компанијата, која традиционално се потпираше на модел со претплати, соопшти дека пилот-програмата со реклами достигнала 100 милиони долари годишен приход по само шест недели.

Во последните недели „Опен еј-ај“ почна да го поедноставува својот широк спектар на производи. Компанијата соопшти дека ќе ја прекине поддршката за видеогенераторот Сора (Sora). Исто така развива десктоп-апликација што ќе ги обедини четботот, алатката за кодирање и веб-прелистувачот - производ што во блог-објава го нарекува „нашата суперапликација“.

„Корисниците не сакаат раздвоени алатки. Тие сакаат еден систем што може да ја разбере намерата, да преземе акција и да функционира низ апликации, податоци и работни процеси“, соопшти компанијата во блог-објава во вторникот, потврдувајќи ги плановите.

Во интерна белешка до вработените за одлуката да се укине Сора, Алтман наведе дека „Опен еј-ај“ ќе реорганизира дел од тимовите за безбедност и сигурност, со цел тие подобро да се интегрираат во процесот на развој и да му се овозможи на извршниот директор повеќе време да се фокусира на инфраструктурни проекти и обезбедување капитал.