„ИБМ“ отвора 750 работни места за ВИ и квантна технологија во Чикаго

„ИБМ“ (International Business Machines Corp.) дополнително го продлабочува својот влог во „ИКМП“ (Illinois Quantum and Microelectronics Park) во Чикаго, со план да отвори 750 работни места во следните пет години.

Работните позиции ќе бидат насочени кон вештачка интелигенција, квантно компјутерство, сајбер-безбедност и наука за податоци, се наведува во заедничкото соопштение објавено во средата од компанијата и гувернерот на Илиноис, Џеј Би Прицкер. „ИБМ“, која ќе добие 19 милиони долари од државна програма за даночни олеснувања, соопшти дека ќе го основа и центарот „ФН Чикаго“ (FutureNow Chicago) во технолошкиот хаб.

Плановите ги зајакнуваат напорите на Прицкер да привлече повеќе работни места и деловни проекти во државата, особено во напредните технологии. Квантниот парк, кој беше најавен во јули 2024 година, а изградбата почна лани во септември, доби почетен поттик од првичната инвестиција од 1 милијарда долари од „ПСИ Квантум“ (PsiQuantum Corp.) со седиште во Пало Алто, Калифорнија. Локацијата ќе биде изградена на местото на поранешна фабрика на „УС Стил“ (US Steel) на јужната страна на Чикаго.

Компанијата кон крајот на 2024 година соопшти дека ќе формира национален алгоритамски центар за квантно компјутерство во комплексот во Чикаго, со партнери меѓу кои се Универзитетот во Чикаго и Универзитетот на Илиноис, Урбана-Шампејн. Државата обезбеди грант од 25 милиони долари за тој проект.