„Алкалоид“ оствари консолидирана добивка од 8,3 милиони евра во првиот квартал од 2026.

„Алкалоид“ АД Скопје во првите три месеци од годинава оствари консолидирана нето-добивка од 515,6 милиони денари (8,3 милиони евра), што е зголемување од пет проценти во однос на истиот период минатата година кога консолидираната добивка на компанијата изнесуваше 491,7 милиони денари (7,9 милиони евра).

Од компанијата информираа дека вкупните остварени консолидирани приходи во периодот јануари-март 2026 година бележат раст од еден процент во споредба со остварените во истиот период во 2025 година.

Вкупните инвестиции во основни средства во периодот јануари-март 2026 година се зголемени за 89 проценти во однос на истиот период од претходната година.

„Речиси половина од вкупните инвестиции се однесуваат на вложувања реализирани преку поврзаното друштво ‚Алкалоид Енергетика‘, насочени кон изградба и развој на фотоволтаични капацитети за производство на електрична енергија од обновливи извори“, соопшти компанијата.

Во првиот квартал од годинава во „Алкалоид“ се реализирани 28 нови вработувања со што групацијата сега брои 3.027 вработени, од кои 2.223 се во земјава, а 804 се вработени во капитално поврзаните друштва во странство.

 

„Трендот на работење во отежнати економски услови, кои беа актуелни во изминатите неколку години, продолжува и во 2026 година. Доминанти предизвици беа инфлацијата и порастот на каматните стапки, а неизвесноста и натаму останува изразена. Друштвото е изложено на каматен ризик главно по основ на краткорочните и долгорочните кредити, при што истиот континуирано се следи и се управува преку директни преговори со банките, без значајни осцилации кај каматните стапки“, соопшти компанијата.

Оттаму додаваат дека глобалните безбедносни кризи, вклучително и ескалацијата на конфликтот поврзан со Иран, дополнително го отежнуваат економскиот амбиент и предвидливоста.

„Овие случувања имаат значително влијание врз глобалните енергетски пазари, предизвикувајќи пораст и зголемена волатилност на цените на енергентите, што создава дополнителни инфлаторни притисоци и тешкотии во синџирите на испорака, како и ризици во однос на достапноста на одредени суровини и материјали“, наведуваат од компанијата.

Од „Алкалоид“ посочуваат дека потенцијалниот ризик од продлабочување на глобалните трговски тензии може да предизвика нови покачувања на цените на суровините и да доведе до зголемени трошоци во работењето.

„Внимателно го следиме развојот на настаните и преземаме соодветни мерки за ублажување на овие потенцијални ефекти“, соопшти компанијата.