„Реплек“ оствари консолидирана добивка од 874.000 евра во првиот квартал од 2026.

„Реплек“ АД во првите три месеци од годинава оствари консолидирана нето-добивка од 53,7 милиони денари (874.000 евра), што е намалување во однос на истиот период минатата година кога консолидираната добивка на компанијата изнесуваше 56,5 милиони денари (919.000 евра).

Од компанијата информираа дека во сегментот фармација, домашниот пазар бележи раст од 20 проценти во однос на истиот период од претходната година, што е резултат на зголемената побарувачка за дел од клучните производни линии и понатамошното зајакнување на пазарната позиција на „Реплек“ АД.

„Овој резултат го потврдува успехот на стратегијата и е директна потврда дека новите производи лансирани во 2025 година наоѓаат своето место на пазарот“, соопшти компанијата.

 

Оттаму додаваат дека ЕБИТДА маржата достигнува 23,5 проценти, што претставува подобрување од 2,8 процентни поени во однос на првиот квартал од 2025 година.

„Ова е значајна структурна потврда дека компанијата успешно ја управува трошочната дисциплина во период на интензивна трансформација“, наведуваат од компанијата.

Од „Реплек“АД посочуваат дека компанијата продолжува со изградбата на новиот производствен погон за полуцврсти и течни форми, додека новата линија за серијализација и пакување веќе е во оперативна употреба.