НЛБ побара амин од КЗК за преземање на „Адико банка“

„Нова љубљанска банка“ (НЛБ) до македонската Комисија за заштита на конкуренцијата доставила известување за коцентрација со која НЛБ ќе стекна самостојна контрола над австриската „Адико банка“.

Од КЗК информираат дека НЛБ следи универзален банкарски модел кој опфаќа малопродажно, корпоративно и инвестициско банкарство, како и управување со средства, банкарско осигурување и лизинг.

„НЛБ е водечка банка во Словенија со, според Народната Банка на Словенија, 33,1 проценти пазарен удел (според вкупниот биланс на состојба) на 31 декември 2025 година. НЛБ е исто така најголемата финансиска групација, мерено според средствата, со седиште во нејзиниот матичен регион на Југоисточна Европа во земјите од поранешна Југославија“, се наведува во соопштението.

Во него се додава дека НЛБ работи на голем број стратешки странски пазари и моментално има банкарски операции во пет други земји, „имено Босна и Херцеговина (каде работи преку две банки, една во Федерацијата и една во Република Српска), Црна Гора, Косово, Северна Македонија и Србија“.

„Во секоја од овие земји, групацијата НЛБ има силна пазарна позиција со пазарни удели (мерени според средствата) што надминуваат приближно 10 проценти. Покрај тоа, НЛБ работи со подружници за инвестициско/управување со средства и лизинг на овие пазари, како и во Хрватска преку ‚Мобил Лизинг‘, Загреб“, наведуваат од КЗК.

 

Оттаму додаваат дека НЛБ Групата во Северна Македонија моментално има 3 поврзани друштва: „НЛБ Банка“ АД Скопје, „НЛБ ЛЕАСЕ&ГО“ ДОО Скопје и „НЛБ ФОНДОВИ“ АД Скопје.

Во однос на „Адико“, од КЗК посочуваат дека станува збор за специјализирана банкарска групација која се фокусира на обезбедување банкарски производи и услуги за потрошувачите и малите и средни претпријатија (МСП) во Централна и Југоисточна Европа (ЦИЕ).

„Групацијата се состои од ‚Адико банка‘ АГ, целосно лиценцирана австриска матична банка регистрирана во Виена, Австрија, котирана на Виенската берза и надгледувана од австрискиот финансиски пазар и од Европската централна банка, како и шест банки-ќерки, регистрирани, лиценцирана кои работат во пет земји од ЦИЕ: Хрватска, Словенија, Босна и Херцеговина (каде што работи преку две банки), Србија и Црна Гора“, пишува во соопштението.

Од КЗК информираат дека „Адико Групата“ нема поврзани друштва, ниту пак има остварено приход во 2025 година на пазарот во Република Северна Македонија.

„Врз основа на прелиминарното испитување Комисијата утврди дека предметната концентрација може да потпадне под одредбите на Законот за заштита на конкуренцијата. Сепак конечната одлука по ова прашање е резервирана“, наведуваат од КЗК.

Комисијата ги повика заинтересираните трети страни да достават забелешки и мислења за оваа концентрација.