„Морган Стенли“ и „Голдман Сакс“ го носат „Антропик“ на берза

Компанијата за вештачка интелигенција „Антропик“ ги избрала „Морган Стенли“ и „Голдман Сакс“ за главни банки кои ќе ја водат нејзината иницијална јавна понуда (ИПО), додека компанијата се обидува да стане првата голема фирма за вештачка интелигенција што ќе излезе на берза пред својот главен конкурент „Опен еј-ај“.

Според извори запознаени со процесот, во подготовките за берзанското деби е вклучен „Морган Чејс“, а компанијата веќе доверливо поднела документација за котирање. Се разгледува можноста ИПО-то да се реализира уште во октомври годинава, иако конечните детали сè уште не се утврдени.

„Антропик“, која стои зад четботот Клод, достигна проценета вредност од 965 милијарди долари по последниот инвестициски круг, со што за првпат ја надмина вредноста на „Опен еј-ај“ и се вброи меѓу највредните приватни компании во светот.

Засилената трка меѓу водечките компании за вештачка интелигенција доаѓа во период кога неколку технолошки гиганти подготвуваат големи берзански листирања. Меѓу нив е и „Спејс екс“ на Илон Маск, која според медиумски извештаи планира да излезе на берза со проценета вредност од 1,8 билиони долари.

Интересно е што „Спејс екс“ истовремено е и конкурент и деловен партнер на „Антропик“. Компанијата обезбедува значителни компјутерски ресурси за развој на ВИ-моделите на „Антропик“, вклучително и пристап до околу 325.000 чипови на „Енвидија“. Според објавените информации, договорот е вреден околу 1,25 милијарди долари месечно и е предвидено да трае до мај 2029 година.

„Антропик“ беше основана во 2021 година од поранешни вработени во „Опен еј-ај“, предводени од извршниот директор Дарио Амодеи. Од своето основање компанијата се позиционира како развивач на вештачка интелигенција со нагласен фокус на безбедноста и одговорниот развој на технологијата.

Нејзиниот модел Клод во последните години забележа значителен раст на корпоративниот пазар, особено во финансискиот и здравствениот сектор, како и меѓу програмерите. Компанијата развива и напредни ВИ-агенти за програмирање кои можат самостојно да пишуваат и коригираат софтверски код со минимална човечка интервенција.

„Антропик“ неодамна привлече дополнително внимание поради нови алатки за автоматизација на дел од правните и финансиските анализи, што предизвика дебати за потенцијалното влијание на вештачката интелигенција врз пазарот на труд и деловните процеси.

Компанијата исто така развива напредни системи за сајбер-безбедност. Според нејзини информации, моделот Митос поседува способности за идентификување и експлоатација на ранливости во голем број оперативни системи и интернет-прелистувачи, поради што пристапот до оваа технологија е ограничен на мал број големи технолошки компании и финансиски институции.

Развојот на ваквите системи дополнително го интензивира интересот на владите и регулаторите за воспоставување правила за употреба на вештачката интелигенција, особено во доменот на сајбер-безбедноста и управувањето со потенцијалните ризици од сè помоќните ВИ-модели.