Поскапуваат „Тему“ и „Шејн“ - новите давачки од ЕУ ќе ги плаќаат крајните купувачи

Нова давачка ќе се применува на производи во вредност помала од 150 евра од 1 јули, по стапка од три евра. Нејзината цел е да го забави приливот на евтина стока однадвор од ЕУ.

Европската Унија го укинува своето de minimis изземање, царинско олеснување, а дополнителната давачка ќе ја плаќаат продавачите, превозниците на пакети или царинските агенти, односно ќе ја пренесуваат на купувачите, што потенцијално може да предизвика доцнења во испораката.

Промената носи компликации за менаџерите задолжени за усогласување со царинските прописи и би можела да доведе до побавни испораки, додека компаниите надвор од ЕУ се загрижени поради дополнителните барања за усогласување, потенцијалниот пад на побарувачката и дополнителните трошоци.

Потрошувачите низ Европската Унија кои бараат поволни понуди ќе почнат да го чувствуваат притисокот од повисоките трошоци за онлајн купување следната недела кога ќе стапи на сила новата давачка, која првенствено е насочена кон Кина. Тоа е нов слој на трговски тензии меѓу двете економии.

Од 1 јули производите во вредност помала од 150 евра ќе подлежат на давачка од три евра. Мерката има цел да го забави приливот на евтина стока однадвор од ЕУ што се продава преку веб-страници како Шејн (Shein) и Тему (Temu).

Увозот од е-трговија во ЕУ минатата година достигна речиси шест милијарди артикли, при што Кина сочинува околу 90 отсто од стоката во вредност под 150 евра, артикли како брза мода, козметика и електроника.

Привремената мерка на ЕУ во некои аспекти ги одразува пошироките трговски проблеми, од компјутерски чипови и ретки метали до автомобили. Огромниот увоз значи дека трговскиот дефицит на ЕУ со Кина расте, а владите се загрижени како нивните домашни компании, големи и мали, можат да опстанат во конкуренција со индустриите од Пекинг кои се силно субвенционирани.

Новата давачка ќе ги погоди купувачите бидејќи ЕУ го укинува таканареченото de minimis изземање, царинско олеснување кое го добило името од латински израз што слободно значи „премногу мало за да биде важно“.

Продавачите, превозниците на пакети или царинските посредници ќе плаќаат дополнителен данок и ќе го пренесуваат на купувачите, а може да дојде и до доцнења на пратките. Сервисот за достава „Федекс“ (FedEx), на пример, во известување со кое ја најавува новата давачка, изјави дека „износот ќе го надомести од купувачот“.

Граничните агенции со децении го дозволуваат изземањето за да го намалат административниот товар и да ги одржат ниски трошоците за онлајн купувачите. Но бранот на евтин увоз стана политичко прашање што придонесе за поттикнување на протекционизмот.

Растечки трговски дефицит на ЕУ со Кина

САД минатата година го укинаа својот царински праг од 800 долари, посочувајќи на пратките што требало да пораснат на 1,4 милијарди долари до 2024 година. Промената предизвика привремени нарушувања. ЕУ вели дека мерката не е протекционизам, туку има цел еднакви услови и подобра безбедност на производите.

„Тоа создаде нелојална конкуренција со која традиционалните трговци не можат да се натпреваруваат“, изјави овој месец Европската комисија, извршното тело на ЕУ. Промената додава уште еден слој на бирократија за менаџерите за усогласеност со царинските прописи, кои веќе се соочуваат со трговски турбуленции, од Брегзит до глобалните царини на американскиот претседател Доналд Трамп.

Царината на ЕУ се наплатува за секој производ врз основа на неговата царинска ознака. Така, пакет од три маици пријавени под иста тарифна ознака би платил царина од три евра. Пакет маица и книга би чинел шест евра. Пратка од три производи наведени под иста ознака, но од три различни земји, би чинела девет евра.

Поголема сложеност

„Ова ќе ги направи работите покомплицирани. Може да дојде до почетен бран на зделки што ќе запрат бидејќи купувачот ќе каже: Заборавете, нема да купам, не сакам да платам дополнителни три, шест или девет евра“, изјави во интервју Мајк Пара, раководител на ДХЛ Европа (DHL Express Europe).

Како дел од модернизацијата на царинскиот режим за е-трговија во ЕУ, која ќе трае до 2028 година, дополнителниот надомест за обработка треба да стапи на сила во ноември, за која ДХЛ проценува дека ќе изнесува околу две евра по пратка.

Depositphotos

Промените би можеле да доведат до побавни испораки до купувачите поради разликите во царинското известување и пренасочување на товарот од експресни услуги кон поголеми консолидирани пратки преку посложени, но поевтини начини на транспорт, рече Пара.

Според британската курирска компанија „Парселхиро“ (Parcelhero), некои превозници пријавуваат тесни грла во синџирите на снабдување во почетната фаза од спроведувањето на новата давачка. Компаниите надвор од ЕУ се загрижени не само поради таксите, туку и поради дополнителните барања за усогласеност и потенцијалниот пад на побарувачката на пазар од околу 450 милиони потрошувачи.

Иако новите протоколи наводно се насочени кон сајтови како „Тему“ и „Шејн“, „решението е сеопфатно“, изјави Марко Форџионе, генерален директор на британскиот Чартерд Институт (Chartered Institute of Export & International Trade).

„Владите добиваат голем прилив на дополнителни средства. Губитници ќе бидат малите бизниси кои работат со ЕУ и сите кои испраќаат стока директно до потрошувачите во ЕУ преку системот на експресни пратки“, изјави тој.