Внатрешен судир во „Блекрок“ поради долгот на „Астон Мартин“

Потенцијалното преструктурирање на долгот во компанијата „Астон Мартин“ подготвува терен за необична битка меѓу различни оддели во гигантот за управување со средства „Блекрок“.

Од една страна се наоѓаат обврзничките фондови на таа компанија, од кои некои се под надзор на главниот директор за инвестиции во инструменти со фиксен принос, Рик Рајдер. Тие се дел од управниот одбор на доверителите кој се организирал за да настапува обединето кон компанијата доколку биде потребно да се разговара за рефинансирање на нејзиниот долг или за обезбедување дополнителна ликвидност.

Скот Капник, соосновач и главен извршен директор на ХПС Bloomberg

Во меѓувреме, „Астон Мартин“ преговара со управители на средства, вклучувајќи го и „ХПС Инвестмент Партнерс“ - специјализиран за приватно кредитирање основан од Скот Капник, Скот Френч и Мајкл Патерсон, кој „Блекрок“ го презеде пред една година - со цел да обезбеди свеж капитал преку преместување на средства надвор од дофатот на постојните кредитори.

Ситуацијата претставува редок случај во кој две страни од кредитното работење на иста компанија се наоѓаат на спротивни страни во преговорите, според лица запознаени со темата.

Претставник на „Блекрок“ одби да даде коментар, додека „Астон Мартин“ не одговори на барањата за коментар.

 

Како што индустријата за управување со средства се консолидира, а поголемите компании преземаат помали играчи, ситуации како оваа со „Астон Мартин“ би можеле да станат почести. Бидејќи некои инвестициски гиганти имаат оддели насочени и кон акции и кон долг, повремено доаѓа до непријатни судири. Некои компании воведоа ограничувања за своето кредитно работење во врска со одобрување заеми на компании што се во сопственост на нивните фондови за приватен капитал.

Но битките во кои две единици на иста компанија се спротивставени доверители се многу поретки.

Изложеноста на „Блекрок“ кон обврзниците на „Астон Мартин“ се наоѓа и во активно управувани фондови и во индексни фондови, покажуваат податоците на „Блумберг“. Компанијата им се приклучи на другите доверители, вклучувајќи и поопортунистички купувачи, во потпишувањето договор за соработка што ги обврзува заеднички да настапуваат во преговорите за долгот со компанијата, поради стравувањата дека „Астон Мартин“ се обидува да обезбеди финансирање на друго место.

ХПС, кој во 2024 година инвестираше во тимот од Формула 1 на „Астон Мартин“, е меѓу фондовите што најдалеку напредувале во преговорите со компанијата за обезбедување нов капитал, рекоа споменатите лица. Сепак, преговорите сè уште траат и нема гаранција дека ќе постигнат договор, додадоа тие, барајќи да останат анонимни бидејќи разговорите се приватни.

Потегот за кој се разговара, познат како „дроп-даун“ (drop-down), би можел да биде скап за постојните доверители. Како знак за неговото влијание, обврзниците на „Астон Мартин“ минатата недела паднаа за дури 10 центи по долар, на најниско ниво во историјата, откако „Блумберг“ извести за разговорите околу долгот.

Некои заемодавачи во понеделникот испратиле писмо до „Астон Мартин“ во обид да го спречат тој договор за долгот. Подготвено со правни експерти, писмото ѝ дава на компанијата рок од 48 часа да потврди дека нема да продолжи со трансакцијата. Во писмото исто така се наведува дека секој договор со ХПС би носел ризици во однос на поврзани страни.

Некои пазарни набљудувачи брзо забележаа дека различни делови на еден управител на средства можат да завршат на спротивни страни на истата трансакција, што е одраз на одделни инвестициски ставови и обврски, а не на вроден судир на интереси.

ХПС, со седиште во Њујорк, кој и понатаму има одвоено седиште во центарот на градот, и претходно укажуваше на потенцијалните проблеми што би можеле да произлезат од спојувањето со најголемиот светски управител на средства.

„'Блекрок' е една од најголемите и најразновидните финансиски институции во светот“, наведе компанијата во пријавата до Комисијата за хартии од вредност и берза на САД во март. „Како резултат на тоа, моментално има, а во иднина би можела да има и други деловни единици кои се натпреваруваат со ХПС или бараат можности за инвестирање што се соодветни за фондовите на ХПС.“

„Блекрок“ во сопствениот поднесок до Комисијата наведе дека би можело да дојде до потенцијален судир на интереси меѓу неговите фондови. Наведено е дека тоа ќе биде ублажено преку „независни инвестициски одлуки“, при што секоја сметка ќе дејствува во сопствен најдобар интерес.

Понекогаш би можело да дојде до дополнителни разговори со вклучените клиенти, се наведува во пријавата. „Блекрок“ би можел да разгледа опции што вклучуваат воздржување од остварување право на глас, останување пасивен во преструктурирањето, инвестирање во истиот дел од капиталната структура за усогласување на интересите или „воздржување од инвестирање или отстранување на инвестиции што доведуваат до такви судири“.

„Астон Мартин“, производителот на луксузни возила со седиште во Англија, чиј најголем акционер е канадскиот милијардер Лоренс Строл, се бори со стабилно генерирање готовински текови откако излезе на берза во 2018 година. Во последно време, доцнењата на производите, слабата побарувачка од Кина и американските царини дополнително ги оптоваруваат неговите финансиски резултати.