text size
Цената на нафтата порасна втор ден по ред, додека трговците ги проценуваат нарушувањата во снабдувањето од Блискиот Исток, при што клучен нафтовод во Саудиска Арабија сè уште е надвор од функција. Во меѓувреме, на Блискиот Исток, американските сили ги блокираат иранските пристаништа со цел да го зголемат економскиот притисок врз Техеран.
Инвеститорската јавност со нетрпение ја очекува и денешната одлука на американските Федерални резерви околу каматите - се очекува нивно зголемување, што дополнително ќе го протресе пазарот на обврзници. Македонската централна банка, и покрај високата неизвесност, не ја промени каматната стапка.
Добро утро, ви пишува Игор Петровски од дигиталната редакција на „Блумберг Адрија“, ова се пет вести за почеток на денот:
Колкав ќар им донесе војната во Заливот на „Макпетрол“ и „Окта“
Двете најголеми нафтени компании што котираат на берза во Македонија ја завршија првата половина од 2026 година со добивка, но зад бројките се крие нешто различна приказна.
“Макпетрол“ го зголемил приходот за околу 23 отсто, но профитот расте многу побавно, додека “ОКТА“ бележи експлозивен раст на ЕБИТДА (добивката пред камати, даноци и амортизација) и нето-добивката. И кај двете компании цените на нафтата, регулацијата и геополитичките ризици остануваат клучни за второто полугодие.
Го губат ли државните обврзници статусот на „безбеден рај“?
Државните обврзници со децении важат за едно од најсигурните места за инвеститорите што сакаат да го заштитат капиталот, особено во периоди на берзански падови и економска неизвесност.
Но, последните движења на глобалните пазари отвораат поинакво прашање: дали државниот долг и понатаму може автоматски да се смета за „безбеден рај“, ако инвеститорите во замена за сигурност добиваат се поголем ризик од инфлација, промена на каматните стапки и пад на цените на самите обврзници?
Финк од „Блекрок“: Ако забавиме со развој на ВИ, технологијата ќе стане домен само на големите фирми
Одложувањата во развојот на вештачката интелигенција поради противењето на јавноста ќе ја претворат оваа технологија во „домен на големите компании“, ограничувајќи го пристапот до неа – предупреди Лари Финк, извршен директор на „Блекрок“ (BlackRock Inc.), најголемата инвестициска компанија во светот.
„Колку побрзо изградиме поголеми капацитети, толку повеќе ќе можеме да ја демократизираме технологијата и да ја направиме достапна за сите“, изјави Финк за време на панел-дискусијата на Канадскиот инвестициски самит, одржан во Торонто.
Најголемото ИПО во Африка ги урна апликациите за тргување
Побарувачката за акции во компанијата „Данготе Петролеум“ (Dangote Petroleum Refinery and Petrochemicals FZE) преоптовари некои од бројните нигериски апликации за инвестирање, кратко откако во понеделникот започна првичната јавна понуда (ИПО).
Големиот интерес за стекнување удел во рафинеријата на Алико Данготе, најбогатиот човек во Африка, ја става на тест нигериската финтек инфраструктура. Милијардерот го отвора сопствеништвото на компанијата за јавноста, нудејќи акции по цена од 40 американски центи по акција и со минимална инвестиција од само 4 долари.
И покрај високата неизвесност, НБРМ не ја промени каматна стапка
Македонската централна банка одлучи да ја задржи основната каматна стапка на нивото од 4,25 отсто. Одлуката се заснова врз најновите макроекономски показатели и очекувања, како и на оцените за ризиците од домашното и надворешното окружување, стои во соопштението од НБРМ.
„Годишната стапка на инфлација се задржува на умерено ниво, но во август беа видливи ефектите од растот на светските цени на енергентите врз домашната инфлација. Извршниот одбор оцени дека сѐ уште е рано за да се потврди одржливоста на трендот на забавување на инфлацијата, особено имајќи го предвид високиот степен на неизвесност во надворешното окружување“, констатира Одборот.
.webp){kind=icon}
