text size
„Алфабет“ (Alphabet Inc.) ја зголеми прогнозата за капитални расходи за оваа година на најмногу 205 милијарди долари, повторно поттикнувајќи загриженост дека компанијата нема доволно финансиска дисциплина во трката за доминација во областа на вештачката интелигенција.
Матичната компанија на „Гугл“ (Google) ја зголеми процената за капиталните инвестиции годинава на меѓу 195 и 205 милијарди долари, во однос на претходната прогноза од 190 милијарди долари. По објавувањето на новите насоки, акциите паднаа дури за пет отсто во продолженото тргување. Тоа е потсетник дека вистинската цена на трката за ВИ во Силициумската Долина сè уште во голема мера е непозната.
„Алфабет“ е првата од големите технолошки компании што ги објавија кварталните резултати. Следната недела тоа ќе го сторат „Мета“ (Meta Platforms Inc.), „Мајкрософт“ (Microsoft Corp.) и „Амазон“ (Amazon.com Inc.). Заедно, четирите компании во април најавија дека годинава ќе потрошат до 725 милијарди долари за своите амбиции во областа на ВИ. Ако примерот на „Алфабет“ е показател, таа сума до крајот на следната недела ќе биде уште поголема. Тоа се случува и покрај тоа што повратот од овие инвестиции сè уште не е јасен.
Поголемиот план за трошење на „Алфабет“ „не остава добар впечаток“, изјави Томас Монтеиро, виш аналитичар во „Инвестинг“ (Investing.com). „Кога на тоа ќе се додадат растечките каматни стапки и постојаниот дисбаланс меѓу понудата и побарувачката за ВИ-инфраструктура, почнува да слабее уверувањето дека компанијата засекогаш ќе може да ги финансира овие инвестиции само од сопствените парични текови.“
Компанијата соопшти дека повисоката прогноза ја одразува намерата побрзо да го прошири капацитетот за пресметки за ВИ и да оствари поголеми приходи од клиентите што користат облачни услуги.
Ова веројатно дополнително ќе го засили вниманието на инвеститорите кон вложувањата во ВИ. Волстрит бара поубедливи докази дека огромните инвестиции на „Алфабет“ во оваа технологија, како и оние на неговите главни конкуренти, создаваат нов раст наместо да вршат притисок врз профитабилноста.
Резултатите на „Алфабет“ за вториот квартал покажаа одреден напредок во таа насока. Приходите од облачните услуги достигнаа 24,77 милијарди долари во периодот што заврши на 30 јуни, што е раст од 82 отсто во однос на истиот период лани и над очекувањата на аналитичарите од 22,46 милијарди долари. Вредноста на договорените, но сè уште непризнаени приходи од облачниот бизнис се зголеми на 514 милијарди долари, од околу 460 милијарди долари во претходниот квартал.
Побарувачката за облачни услуги е поттикната од силната побарувачка за ВИ-инфраструктура и ВИ-решенија, изјави главниот извршен директор Сундар Пичаи во разговор со аналитичарите.
„Гугл клауд“ (Google Cloud) се наметна како еден од најјасните показатели дали инвестициите на „Алфабет“ во ВИ можат да донесат финансиски поврат. Иако сè уште заостанува зад „Амазон веб сервисис“ (Amazon Web Services) и „Мајкрософт азур“ (Microsoft Azure), овој сегмент стана еден од најбрзорастечките бизниси на „Алфабет“, поттикнат од побарувачката од стартапи што развиваат ВИ и корпоративни клиенти на кои им е потребна инфраструктура за развој и примена на апликации со вештачка интелигенција.
Подобрите од очекуваните приходи од облачните услуги се јасен показател дека инвестициите на компанијата „се претвораат во брзорастечки и профитабилни приходи, при што договорените проекти почнуваат да носат приходи веднаш штом ќе се обезбеди потребниот капацитет“, изјави Монтеиро.
„Гугл“ соопшти дека најголемиот дел од договорените, но сè уште непризнаени приходи од облачниот бизнис произлегува од стандардни договори со „широк спектар клиенти“ и дека очекува повеќе од половината од тие приходи да ги признае во следните 24 месеци.
Приходите од рекламирање преку пребарувачот достигнаа 63,27 милијарди долари, што е малку под очекувањата на аналитичарите. Овој сегмент и натаму е столбот на рекламниот бизнис на „Гугл“ и засега успешно се справува со конкуренцијата од ВИ-четботовите. Долгорочното прашање за инвеститорите е дали моделот за вештачка интелигенција Џемини (Gemini) ќе му помогне на „Гугл“ да ја зачува водечката позиција во интернет-пребарувањето, во време кога се менува начинот на кој луѓето доаѓаат до информации.
Бројот на месечно активни корисници на системот за вештачка интелигенција Џемини достигна 950 милиони, над очекувањата на аналитичарите, но под нивото од првиот квартал. Џемини сега е на чекор да стане трет производ на „Гугл“ за широка потрошувачка со повеќе од една милијарда корисници, покрај прегледите со ВИ (AI Overviews) и режимот за пребарување со ВИ (AI Mode)“, изјави главниот аналитичар на „Имаркетер“ (Emarketer), Нејт Елиот.
„Гугл“ продолжи да го проширува семејството модели на Џемини, претставувајќи нови верзии како „Џемини 3.6 Флеш“ (Gemini 3.6 Flash), дизајнирани за поголема ефикасност и поддршка на корпоративни апликации со ВИ. Сепак, доцнењето на „Џемини 3.5 Про“ (Gemini 3.5 Pro) отвори прашања за тоа како „Гугл“ планира да го позиционира моделот во производите за потрошувачи и алатките за програмери, вклучувајќи го и програмирањето со помош на ВИ, каде што „Антропик“ и „Опен еј-ај“ (OpenAI) стекнаа значителна предност кај програмерите.
Во исто време Пичаи се обиде да го пренасочи вниманието кон „Џемини 4“, истакнувајќи во разговорот со аналитичарите дека е охрабрен од неговиот напредок и опишувајќи го како значително поголем модел од новата генерација, на чиј развој и обука „Гугл“ во моментов им дава приоритет.
Bloomberg
„Џемини 4“ (Gemini 4) ќе означи почеток на побрзо објавување нови модели, при што тие ќе се претставуваат „речиси секој месец“, изјави Пичаи. Со тоа „Гугл“ ќе се израмни со конкурентите „Антропик“ и „Опен еј-ај“, кои редовно објавуваат нови верзии на своите модели.
Видеоплатформата „Јутјуб“ (YouTube) оствари приходи од 11,1 милијарди долари, надминувајќи ги очекувањата на аналитичарите. Овој сегмент останува еден од најсилните бизниси на „Алфабет“, бидејќи „Јутјуб“ го проширува своето присуство на паметните телевизори, преку содржини од креатори и нови алатки со ВИ за гледачите и креаторите.
„Јутјуб“ е малку подобар отколку во претходниот период и ја прекина негативната низа што траеше неколку квартали, но и понатаму има чувство дека во вакви услови треба да остварува уште подобри резултати“, изјави Брајан Малбери, главен пазарен стратег во „Закс“ (Zacks Investment Management).
Инвестициското портфолио на „Алфабет“ станува сè поважен извор на раст за компанијата, благодарение на уделите во компании како „Антропик“ и „Спејс екс“ (SpaceX). Добивките од зголемувањето на вредноста на овие инвестиции достигнаа речиси 100 милијарди долари во кварталот, што придонесе за силен раст на нето-добивката.
Сегментот на „Алфабет“ „Други вложувања“ (Other Bets), во кој се наоѓаат долгорочни проекти како компанијата за биотехнолошки науки „Верили“ (Verily) и единицата за автономни возила „Вејмо“ (Waymo), оствари приходи од 382 милиони долари, што е под очекувањата на аналитичарите. „Алфабет“ продолжува да инвестира значителни средства во „Вејмо“, додека истовремено настојува некои од другите експериментални проекти да добијат поголема независност како самостојни компании, објави претходно „Блумберг“.
Компанијата во средата соопшти дека капиталните расходи во вториот квартал достигнале 44,92 милијарди долари, што е над очекувањата на Волстрит од 44,15 милијарди долари. Вкупните приходи, без исплатите кон партнерите, изнесувале 103,6 милијарди долари во вториот квартал, надминувајќи ја просечната прогноза на аналитичарите од 101,07 милијарда долари. Нето-добивката изнесувала 9,11 долари по акција, значително над прогнозите на Волстрит.
Што вели „Блумберг интелиџенс“
Заостанатите договори на „Гугл клауд“ во вредност од 514 милијарди долари, од кои повеќе од половината се очекува да се претворат во приходи во следните 24 месеци, укажуваат на долгорочен и договорно обезбеден раст, што ги поддржува нарачките од, според нашите процени, еден од најголемите клиенти на „Инолајт“ (Innolight). Со оглед на тоа што циклусот на надградба кон 1,6T ја зголемува вредноста на оптичките компоненти во центрите за податоци со ВИ, очекуваме компанијата да го задржи троцифрениот раст на продажбата во следните квартали и да ги надмине прогнозите за 2026 година, бидејќи капиталните расходи на најголемите оператори на облачни услуги продолжуваат да растат.
-Шон Чен, аналитичар
.webp){kind=icon}
