„Енвидија“ размислува за финансиска гаранција за проект на “Опен еј-ај“ вреден 500 милијарди долари

Компанијата „Енвидија“ води разговори за обезбедување финансиска гаранција што би му помогнала на „Опен-еј-ај“ да закупи компјутерски капацитети од проект за центар за податоци во САД, планиран за 2028 година. Ова дополнително покажува како највредната компанија во светот вложува капитал во инфраструктурата што директно го поттикнува нејзиниот бизнис.

Според лица запознаени со разговорите, „Енвидија“ разговара за можноста да му помогне на креаторот на Чат ГПТ да закупи капацитети во центар за податоци со вредност од 500 милијарди долари и моќност од 10 гигавати, чија изградба во сојузната држава Охајо ја надгледува „Софт банк“.

Американскиот производител на чипови би можел да обезбеди гаранција во вредност до 250 милијарди долари во корист на „Опен-еј-ај“, изјави еден од изворите. Разговорите сè уште се во рана фаза и постои можност да пропаднат, а условите за финансирање да бидат променети, велат изворите кои побарале анонимност поради доверливоста на разговорите.

Гаранцијата од „Енвидија“ би го истакнала сè поизразениот кружен начин на финансирање што стои зад бумот на вештачката интелигенција, при што технолошките гиганти финансираат сè поголеми проекти кои на крајот генерираат дополнителен бизнис токму за нив.

Во последните недели инвеститорите стануваат повнимателни кон високите вреднувања на технолошките акции, стравувајќи дека под изградба има повеќе капацитети отколку што идните услуги базирани на вештачка интелигенција ќе можат да искористат. Големи американски компании, од „Мета“ до „Алфабет“, во последните месеци го зголемија задолжувањето за да го финансираат историскиот бран на изградба на инфраструктура, што предизвикува загриженост дека се инвестира премногу агресивно во технологија која сè уште не обезбедува стабилни приноси.

Комплексот за центри за податоци во Охајо, според сегашните планови, би бил меѓу најголемите во светот и симбол на огромната побарувачка за компјутерска моќ потребна за развојот на вештачката интелигенција. Проектот претставува и една од клучните иницијативи на основачот на „Софт банк“, Масајоши Сон, како и на администрацијата на Доналд Трамп, која инвестицијата ја претставува како значајна економска победа.

Јапонската инвестициска групација планира, заедно со другите големи технолошки компании, да насочи билиони долари во изградба на центри за податоци и развој на вештачка интелигенција во наредните години. Голем финансиски договор со „Енвидија“ би му помогнал на „Софт банк“ да обезбеди дополнителен капитал за проектот во Охајо, кој го развива неговата подружница „Ес-би енерџи“.

„Иако инвестициите и партнерствата на ‘Енвидија’ ја зајакнуваат довербата во долгорочниот развој на инфраструктурата за вештачка интелигенција, инвеститорите и понатаму се загрижени поради кружното финансирање“, изјави Гери Тан, портфолио-менаџер во „Олспринг глобалн инвестнетс“.

Програмерот на Чат ГПТ  веќе неколку недели преговара за обезбедување на тие капацитети, објави претходно „Вол струт џурнал“. Одделно, „Енвидија“ разговара и за финансирање на набавки на чипови за „Опен-еј-ај“ во вкупна вредност до 350 милијарди долари, наведува весникот, повикувајќи се на добро упатени извори.

Претставниците на „Енвидија“, „Опен-еј-ај“ и „Софт банк“ засега не одговорија на барањата за коментар.

Извршниот директор на „Енвидија“, Џенсен Хуанг, веќе насочи милијарди долари кон компании низ целиот синџир на снабдување поврзан со вештачката интелигенција. Неговата цел е да ја забрза примената на производите на „Енвидија“ и да ги отстрани пречките што би можеле да го забават ширењето на оваа технологија.

Компанијата одделно инвестира 1 милијарда долари во јужнокорејската „Навер“ за поддршка на изградбата на центар за податоци за вештачка интелигенција, а воедно соработува со „СК Груп“ на изградба на повеќе од 2 гигавати нови капацитети за центри за податоци на Корејскиот Полуостров.

За „Енвидија“, поблиската соработка со СК има и дополнителна стратешка вредност бидејќи овозможува подобар пристап до мемориски чипови со висок пропусен опсег (HBM). Компанијата „СК Хајникс“ и нејзиниот јужнокорејски конкурент „Самсунг електроникс“ се двата најголеми снабдувачи на овие клучни компоненти, кои моментално се во недостиг поради глобалната експанзија на центрите за податоци за вештачка интелигенција.

Хуанг тврди дека инвестициите во компании како „Антропик“ и „Опен-еј-ај“ не само што ќе му помогнат на основниот бизнис на „Енвидија“, туку ќе донесат и директен финансиски принос.

Од друга страна, критичарите предупредуваат дека ваквите потези би можеле вештачки да ја надујат побарувачката за технологии поврзани со вештачката интелигенција.