„Антропик“ преговара за купување на стартапот „Декарт“ за шест милијарди долари

„Антропик“ (Anthropic PBC) преговара за купување на стартапот за вештачка интелигенција „Декарт“ (Decart AI) за околу шест милијарди долари, според лица запознаени со ова прашање.

„Декарт“ развива таканаречени светски модели, чија цел е да го симулираат физичкиот свет, како и софтвер што може да ги намали трошоците за тренирање на ВИ така што им помага на чиповите да работат поефикасно. Последната технологија би можела да ѝ помогне на постојната инфраструктура на „Антропик“ да одговори на поголема побарувачка, вели лице запознаено со ова прашање. „Антропик“, кој ретко прави големи преземања, троши значителни средства на компјутерска моќ за развој на нови производи и опслужување на клиентите.

Договорот сè уште не е финализиран и преговорите би можеле да пропаднат, изјавија некои од лицата, кои побараа да не бидат именувани бидејќи разговараат за приватни преговори. Доколку биде завршена, ова би била најголемата позната аквизиција на „Антропик“, пред долгоочекуваната иницијална јавна понуда.

Тимот на „Декарт“ би се приклучил на организацијата на „Антропик“ за инференција и перформанси, изјави едно од лицата.

Светските модели на „Декарт“ имаат цел да им помогнат на компаниите во низа примени, вклучувајќи автономно возење и е-трговија. Неговиот ВИ-модел Луси, на пример, може да прими видео во живо од некое лице и да го искористи за во реално време да генерира видео со висока резолуција, на кое изгледа како лицето навистина да пробува фустан или чанта - задача што долго време им создаваше проблеми на развивачите на технологии за модна е-трговија. Реалистичното прикажување на ткаенините долго време претставуваше пречка. Платформата за е-трговија „Ибеј“ (eBay Inc.), која е инвеститор во компанијата, исто така е клиент на „Декарт“.

Способноста на „Декарт“ да користи ВИ за моментално менување видеосодржини во живо укажува на висококвалитетна експертиза во областа на инфраструктурата, изјави едно од лицата.

Претставниците на „Антропик“ и „Декарт“ одбија да коментираат.

„Декарт“ во мај соопшти дека обезбедил 300 милиони долари во инвестициска рунда предводена од „Радикал“ (Radical Ventures), во која се приклучиле „Енвидија“ (Nvidia Corp.), „Атреидис“ (Atreides Management), „Валор“ (Valor Equity Partners) и „Адобе“ (Adobe Ventures). Во рундата учествувале и претходните инвеститори „Секвоја“ (Sequoia Capital), „Бенчмарк“ (Benchmark) и „Зеев“ (Zeev Ventures). Со оваа рунда стартапот бил проценет на речиси четири милијарди долари, објави „Волстрит џурнал“, што е зголемување од 3,1 милијарда долари во август 2025 година.

Стартапот е основан во 2023 година од тројца израелски инженери, браќата Дин и Ориан Лајтерсдорф и Моше Шалев.

За време на интервју за „Блумберг њуз“ на конференцијата Рајс ВИ (Raise AI) во Париз во јули, главниот извршен директор Дин Лајтерсдорф изјави дека компанијата ја тренира својата ВИ со текст и милиони часови видеоматеријали за да научи да ги симулира физичките својства на реалниот свет. Тој рече дека технологијата на „Декарт“ се користи за преноси во живо на онлајн-платформи како „Твич“ (Twitch), „Тикток“ (TikTok) и „Јутјуб“ (YouTube) од инфлуенсери како Код Мико (CodeMiko), како и од рекламни компании и други.

„Навистина не можам да замислам да бидам на кој било друг пазар“, рече тој тогаш. „Овој пазар се движи толку брзо. Во следните 18 до 24 месеци ќе можеме одново да го осмислиме секој различен аспект на економијата.“

Израелскиот деловен медиум „Калкалистек“ (Calcalistech) објави дека „Декарт“ исто така преговарал за преземање од страна на „Спејс екс“ (SpaceX), а милијардерот Илон Маск го нарече извештајот „лажна вест“ на својата платформа за социјални медиуми X.

„Опен еј-ај“ (OpenAI) и „Антропик“ поединечно се обврзаа да потрошат десетици, ако не и стотици милијарди долари за центри за податоци опремени со скапи чипови. Компаниите сè повеќе се потпираат на хардвер од повеќе различни добавувачи за да ги задоволат своите нагло растечки потреби за компјутерски ресурси. Тие трошоци, за кои велат дека се неопходни за развој и поддршка на најнапредните модели, исто така би можеле да ги оптоварат стартапите за ВИ додека се подготвуваат за своето деби на Волстрит во наредните месеци.

-Со помош на Рејчел Мец