„Алибаба“ со 75 отсто помал профит поради големите инвестиции во ВИ

Нето добивката на „Алибаба“ (Alibaba Group Holding Ltd.) паднала за повеќе од 75 проценти откако кинеската компанија ги зголемила своите квартални капитални инвестиции на речиси 10 милијарди долари, обидувајќи се да ја зајакне својата позиција во жестоката глобална трка за развој на вештачка интелигенција (ВИ).

Компанијата, која од лидер во онлајн трговијата стана главен играч во секторот за ВИ, забележа пораст на приходите од девет проценти, во согласност со очекувањата, благодарение на силната побарувачка за компјутерски капацитет што го нуди нејзината клауд дивизија. Сепак, нето добивката се намалила за три четвртини на 10,5 милијарди јуани (1,6 милијарди долари), додека слободниот паричен тек забележал одлив од 6,6 милијарди долари, што одразува зголемени трошоци за проекти за ВИ и компјутерска инфраструктура. Акциите на „Алибаба“ во САД паднаа за повеќе од 4 проценти во претпазарното тргување, но потоа во текот на денот се повратија и затворија со добивка од 1,26 отсто.

Кинескиот лидер во онлајн трговијата ја зацврсти својата позиција како еден од водечките светски играчи во ВИ оваа година, откако нејзиниот водечки модел „Квен“ (Qwen) стана најпопуларното семејство модели со ВИ во светот. Компанијата вети на почетокот на 2025 година дека ќе инвестира повеќе од 380 милијарди јуани во сè, од чипови до центри за податоци во текот на следните три години, што ја прави еден од најголемите инвеститори во вештачка интелигенција во Кина. Напорите да се натпреварува со компании како „Антропик“  и „Опен еј-ај“ ги намалуваат маржите на профит, додека слабата домашна потрошувачка го оптоварува нејзиниот основен бизнис за онлајн трговија.

Сепак, извршниот директор Еди Ву во четврток истакна дека инвестициите во вештачка интелигенција се исплатуваат. „Алибаба“ очекува годишните приходи од производите за вештачка интелигенција да достигнат речиси 10 милијарди долари во овој квартал, во споредба со околу 7,3 милијарди долари во периодот април-јуни. Менаџментот на компанијата очекува дека вкупната инвестиција во вештачка интелигенција може да се врати во рок од три години.

„Нашиот бизнис со вештачка интелигенција е сè повеќе способен самостојно да го финансира својот понатамошен развој, што ни дава дополнителна доверба да продолжиме да инвестираме“, им рече Ву на аналитичарите. „Вештачката интелигенција стана наш најсигурен двигател на раст. Ќе ја одржиме стратешката дисциплина и ќе го поттикнеме долгорочниот раст преку нашите интегрирани можности за ВИ на сите нивоа.“

 

Bloomberg

 

Минатата недела и „Тенсент“ (Tencent Holdings Ltd.) ги вознемири инвеститорите. Компанијата што стои зад „Вичет“ (WeChat) ги зголеми своите инвестиции во ВИ повеќе од двојно, што е доказ за растечките трошоци за натпреварување за лидерство или опстанок во брзорастечкиот сектор на ВИ.

Ву претходно изјави дека „Алибаба“ ќе даде приоритет на растот пред краткорочните профити. Компанијата ги консолидираше повеќето од своите тимови за истражување и развој на производи од ВИ под „Алибаба Токен Хаб“ (Alibaba Token Hub), деловна единица директно управувана од Ву. Во исто време, во последните две години, продаваше средства што не се дел од нејзината основна дејност, вклучувајќи ја и компанијата за игри „Лингџи Гејмс“ (Lingxi Games), која ја продаде овој месец.

Крајната цел е „Алибаба“ да ги зголеми своите приходи од клауд услугите и вештачката интелигенција петкратно на 100 милијарди долари во следните пет години.

Сепак, растот на капиталните трошоци и негативниот слободен паричен тек би можеле да предизвикаат загриженост во врска со дополнителните капитални потреби и приносите од инвестициите, велат аналитичарите на „Ситигруп“.

Кинеските компании за вештачка интелигенција се под сè поголем притисок од инвеститорите да ги претворат големите капитални инвестиции во опипливи приноси, а сепак претежно да ги нудат своите модели бесплатно или по многу ниски цени во споредба со американските конкуренти.

На почетокот на годината, „Алибаба“ дејствуваше порешително во своите напори да почне да заработува пари од ВИ. Сепак, сега повторно дава приоритет на привлекувањето на корисниците пред профитот, бидејќи го понуди својот најнов водечки модел, „Квен 3.8 Макс“ (Qwen 3.8 Max), како модел со „отворена тежина“ (анг. open-weight, кај овие модели достапни се тежини или параметри што одредуваат како моделот учи, обработува информации и дава одговори). Ова е прв пат да ги објави вредностите што одредуваат како системите за вештачка интелигенција донесуваат одлуки за својата најголема класа модели.

Аналитичарите на Блумберг Интелиџенс, Роберт Ли и Јасмин Лиу, проценуваат дека слабите резултати на „Алибаба“ во првиот фискален квартал го потврдуваат нивниот став дека вештачката интелигенција ќе продолжи да ги намалува, а не да ги зголемува, приносите на водечките кинески компании за ВИ – „Тенсент“, „Баиду“ и „Алибаба“. Прилагодената ЕБИТДА во Cloud Intelligence одделот  на „Алибаба“ се зголеми во текот на кварталот за само 420 милиони долари, што претставува слаб поврат на инвестициите, додека капиталните расходи се зголемија 2,6 пати во споредба со претходниот квартал, на дури 10 милијарди долари.

Слободниот паричен тек на „Алибаба“ дополнително се влоши, со одлив од околу 6,6 милијарди долари, во споредба со 2,5 милијарди долари во претходниот квартал, поради високите трошоци за инвестиции во вештачка интелигенција. Загубите на прилагодената ЕБИТДА во бизнисот со лаборатории и апликации за ВИ се зголемија за повеќе од четири пати на 2 милијарди долари, и покрај значителниот технолошки напредок на компанијата. Според аналитичарите на Блумберг Интелиџенс, бизнисот со вештачка интелигенција на „Алибаба“ ќе генерира негативен паричен тек уште најмалку три години.

„Алибаба“ се стреми да ги зголеми приходите од вештачка интелигенција со привлекување корисници кои се подготвени да платат за своите програмски платформи и агенти за вештачка интелигенција, во обид да освои дел од брзорастечкиот пазар доминиран од конкуренти како што се „Тенсент“ и „БајтДенс“.

„Дубао“ на „БајтДенс“, моментално најпопуларната апликација за вештачка интелигенција во Кина, воведе модел на претплата оваа година. „Алибаба“ исто така ја управува апликацијата „Квен“, сеопфатен асистент за вештачка интелигенција кој се справува со секојдневните задачи како што се купување и плаќања. Во наредните квартали, ќе се соочи со нов агент за вештачка интелигенција на платформата „ВиЧат“ на „Тенсент“.