„Мерцедес“ почнува откуп на сопствени акции во вредност од милијарда евра

„Мерцедес“ (Mercedes-Benz Group AG) од неделава ќе откупи сопствени акции во вредност до една милијарда евра (1,2 милијарди долари), продолжувајќи ја програмата за враќање на капиталот на акционерите и покрај падот на продажбата во Кина.

Надзорниот одбор на германскиот производител на автомобили го одобри планот, кој ќе започне на 1 септември и ќе биде завршен до 6 април, соопшти во понеделникот „Мерцедес“. Со тоа се формализирани плановите што компанијата веќе ги најави во јули, при објавувањето на резултатите за вториот квартал. Откупените акции ќе бидат поништени.

„Мерцедес“ се обидува да воспостави рамнотежа меѓу враќањето на капиталот на акционерите и инвестирањето во електрични возила (ЕВ) и софтвер, во момент кога конкуренцијата станува сè поостра, особено во Кина. Компанијата претходно годинава заврши одделна програма за откуп на акции вредна две милијарди евра.

Акциите на „Мерцедес“ беа речиси непроменети на почетокот на тргувањето во понеделникот во Франкфурт. Од почетокот на годината изгубија повеќе од една петтина од вредноста.

Автомобилската дивизија на компанијата во вториот квартал оствари приспособена профитна маржа од четири отсто, значително под целите на компанијата. „Мерцедес“ ги намалува трошоците и производствените капацитети, додека извршниот директор Ола Калениус започнува серија нови модели, меѓу кои се новата лимузина ЦЛА и електричниот теренец ГЛЦ.

Откупот ќе биде спроведен преку независна банка, а би можел привремено да биде прекинуван за време на одделните програми за купување акции за вработените, кои се очекуваат во ноември и март, соопшти „Мерцедес“.