„Енвидија“ ја купува ВИ-платформата „Хагинг фејс“ за 13 милијарди долари

„Енвидија“ (Nvidia Corp.) се согласи да го преземе стартапот за вештачка интелигенција „Хагинг фејс“ (Hugging Face) во трансакција вредна околу 13 милијарди долари.

Гигантот за производство на чипови соопшти дека ќе ја задржи платформата на „Хагинг фејс“ отворена и усогласена со постојните практики на стартапот.

„Според оваа обврска, ’Хагинг фејс’ ќе продолжи да им дозволува на креаторите на модели, програмерите и корисниците да поставуваат и преземаат модели и бази на податоци по сопствен избор и да поддржуваат и други производители на чипови“, се наведува во соопштението. „Блумберг њуз“ (Bloomberg News) претходно објави дека „Енвидија“ е на пат да постигне договор уште оваа недела.

Купувањето на „Хагинг фејс“ е најголемиот потег досега во настојувањето на извршниот директор на „Енвидија“, Џенсен Хуанг, да ја прошири употребата на вештачката интелигенција и да ја зголеми листата на свои клиенти. Договорот ѝ дава на „Енвидија“ контрола врз една од клучните платформи на кои програмерите ги прикажуваат и споделуваат моделите за вештачка интелигенција.

Хуанг е посветен на поттикнување на таканаречените модели со отворен код, со цел технологијата на неколку големи компании да не доминира со вештачката интелигенција. Некои од тие компании во моментов се најголеми клиенти на „Енвидија“, но истовремено забрзано развиваат сопствени проекти за чипови.

„Енвидија“ веќе беше инвеститор во „Хагинг фејс“, заедно со „Гугл“ (Google) на „Алфабет“ (Alphabet Inc.), „Амазон“ (Amazon.com Inc.), „Интел“ (Intel Corp.) и „Сејлсфорс“ (Salesforce Inc.), меѓу другите.

Основан во 2016 година, „Хагинг фејс“ управува со платформа за споделување модели на вештачка интелигенција што други можат слободно да ги користат. Стартапот беше проценет на 4,5 милијарди долари во инвестициски круг пред три години. За разговорите на „Енвидија“ со компанијата претходно објави „Бизнис инсајдер“.

„Хагинг фејс“ неодамна се најде во центарот на сајбер-безбедносен инцидент во кој модел што го тестираше „Опен еј-ај“ (OpenAI) ненамерно ја хакираше платформата. Пробивот предизвика загриженост во врска со безбедноста на најнапредната технологија за вештачка интелигенција. „Опен еј-ај“ соопшти дека можел порано да реагира за да го спречи нападот врз системите на „Хагинг фејс“.

Преземањето на „Хагинг фејс“ се надоврзува на листата на договори што „Енвидија“ ги склучи во изминатата година, вклучувајќи го и договорот за лиценца од 6 милијарди долари во август со стартапот „Пулсајд“ (Poolside), кој вклучуваше понуди за работа за голем број вработени во таа компанија. „Енвидија“ исто така плати околу 20 милијарди долари за најголемиот дел од стартапот за чипови „Грок“ (Groq).

„Енвидија“, највредната компанија во светот, е водечки производител на акцелератори за вештачка интелигенција, односно чипови што помагаат во обучувањето и работењето на моделите. Компанијата постепено додава различни други технологии, вклучувајќи и софтвер, со цел да ја прошири економијата поврзана со вештачката интелигенција.

Компанијата со седиште во Санта Клара, Калифорнија, минатата недела даде изненадувачки силна прогноза за продажбата за фискалната 2028 година, наведувајќи дека приходите ќе пораснат за околу 70 отсто.