Зделката со „Енвидија“ направи милијардери од тројца Французи, соосновачи на „Хагинг фејс“

Тројцата француски основачи на „Хагинг фејс“ (Hugging Face) станаа милијардери откако „Енвидија“ се согласи да ја преземе платформата за вештачка интелигенција во трансакција вредна околу 13 милијарди долари. Со тоа се заокружува една деценија долгата трансформација на компанијата, која започна како стартап со сосема поинаква идеја.

Клеман Деланг-Клем (38), Жилиен Шомон (42) и Томас Волф (41), според индексот на милијардери на „Блумберг“, сега имаат по околу 1,8 милијарда долари. Ова е првпат „Блумберг“ да го процени нивното богатство. „Хагинг фејс“, компанија со седиште во Бруклин, која беше основана во Париз во 2016 година, не одговори на барањата за коментар за богатството на основачите.

Договорот, кој се очекува да биде завршен во првата половина на 2027 година, претставува најголемиот досегашен потег на извршниот директор на „Енвидија“, Џенсен Хуанг, за поширока примена на вештачката интелигенција и проширување на кругот на корисници на компанијата. Наедно, ова претставува голем тест за „Хагинг фејс“, која долго време се залага индустријата да остане отворена и децентрализирана.

Компанијата својата мисија ја опишува како „демократизирање на доброто машинско учење“ и се споредува со библиотека за вештачка интелигенција. „Чест ми е што Клем дојде кај мене додека го разгледуваше следното поглавје за ’Хагинг фејс’ и веруваше дека ’Енвидија’ би била одличен дом за компанијата“, истакна Хуанг во објава на блог со која беше најавен договорот.

„Хагинг фејс“ управува со платформа за споделување модели на вештачка интелигенција што можат слободно да ги користат други корисници. Компанијата годинава беше во центарот на сајбер-инцидент, откако ненамерно беше хакирана преку модел што го тестираше „Опен еј-ај“ (OpenAI).

Според договорот објавен во четвртокот, „Енвидија“ се обврза „Хагинг фејс“ да остане отворена платформа, на која корисниците ќе можат да поставуваат и преземаат модели и бази на податоци за вештачка интелигенција по свој избор. Тројцата соосновачи ќе останат во компанијата според шестгодишен договор за задржување, изјави Волф во интервју за „Блумберг ТВ“ (Bloomberg TV). Тој додаде дека сајбер-нападот бил една од причините поради кои компанијата одлучила да се продаде.

„Или ќе собереме повеќе пари и ќе ја дуплираме нашата стратегија или ќе најдеме некој што длабоко ги споделува нашите вредности и нашата мисија и ќе стапиме во партнерство со него“, рече Волф.

Тројцата основачи ја направија јавната достапност на поевтини модели на вештачка интелигенција со отворен код своевидно мото на компанијата. Претходно годинава дури организираа и уличен марш во Сан Франциско во поддршка на овој принцип.

„Мислам дека би било навистина одлично ако можеме да овозможиме и да охрабриме повеќе луѓе да бидат креатори на вештачка интелигенција, бидејќи тоа значи дека нема да им го препуштиме тоа само на неколку лаборатории во Силициумската Долина“, изјави Деланг, извршен директор на „Хагинг фејс“, на конференција претходно годинава.

Тројцата основачи на „Хагинг фејс“ сега им се придружуваат на основачите на парискиот „Мистрал“ (Mistral AI) како француски државјани што станале милијардери благодарение на уделите во компании од областа на вештачката интелигенција и компјутерската технологија. Во оваа група се и Оливие Помел и Алексис Ле-Кок, основачите на њујоршката „Датадог“ (Datadog Inc.), кои во изминатите години продале акции во вредност од по околу 1,4 милијарда долари.

Нивниот успех поттикна преиспитување во Франција, бидејќи во случајот со „Датадог“ и „Хагинг фејс“ создавањето на богатството се случи надвор од земјата. Францускиот претседател Емануел Макрон постави политички приоритет Франција да стане сериозен глобален конкурент во областа на вештачката интелигенција. Иако двете компании го покажуваат инженерскиот потенцијал на Франција, тие истовремено ги илустрираат предностите на обемните американски пазари на капитал за финансирање на растот на технолошките компании и создавањето богатство.

И покрај тоа што седиштето на компанијата е во Њујорк и што живее во Мајами, Деланг изјави дека „Хагинг фејс“ се смета себеси за француско-американска компанија и дека е „силно поврзана со Франција“, каде што се наоѓа најголемиот дел од нејзините вработени.

Неговото прво стартап-искуство било со „Мудстокс“ (Moodstocks), компанија што развивала машинско учење засновано на технологија за препознавање слики, а подоцна била купена од „Гугл“. Според неговиот профил на Линкдин, Деланг студирал на универзитети во Мадрид, Даблин и Бангалор, пред да продолжи на француско деловно училиште и да посетува онлајн курс по компјутерски науки на Универзитетот „Стенфорд“, каде што дел од студиите завршил и соосновачот Шомон.

Тие ја основале компанијата пред една деценија, избирајќи го името „Хагинг фејс“ како „привремено“ име, инспирирано од емотикон. Подоцна се приклучиле на стартап-кампусот „Стејшн Ф“ (Station F) на милијардерот Ксавие Нил, сместен во реконструирана железничка товарна станица стара еден век во Париз. „Стејшн Ф“ во објави на Линкдин покажа плоча во нивна чест и наведе дека тројцата првпат пристигнале во 2017 година за да развиваат четбот за тинејџери, по што ја промениле насоката, почнале да собираат средства и прераснале во „титан на успешна продажба“.

Идејата за создавање платформа за модели со отворен код се појавила откако Волф поминал еден викенд работејќи на детали од моделот Берт на „Гугл“, а потоа го објавил онлајн, каде што наишол на голем интерес.

Како главен научен директор, Волф, кој живее во Холандија, беше еден од двигателите зад минатомесечното претставување на роботот Микродак (Microduck), двоножен робот што пее и чини 400 долари. Тој рече дека целта е да се покаже дека вештачката интелигенција е „многу достапна“ и дека не е скапа или застрашувачка. Влегувањето на компанијата во роботиката следуваше откако таа ја презеде француската компанија „Полен роботикс“ (Pollen Robotics).

Како и Шомон, Волф посетувал една од елитните инженерски школи во Франција, Политехничкото училиште (École Polytechnique). Потоа докторирал физика и завршил правни студии во Париз, па шест години работел како адвокат за патенти со клиенти меѓу кои биле повеќе стартапи за машинско учење.

Шомон, кој е главен технолошки директор и живее во Бруклин, е и меѓу соосновачите на стартапот за читање „Глос“ (Glose), кој подоцна беше купен од „Медиум“ (Medium). Во четвртокот тој објави свој личен став за договорот, оценувајќи дека вештачката интелигенција се наоѓа „во пресвртна точка“, во која отворениот код би можел да стане помалку релевантен доколку големите затворени лаборатории ја преземат доминацијата.

„Со оглед на ставот на Џенсен за вештачката интелигенција со отворен код и начинот на кој застана во нејзина одбрана кога беше под закана, ’Енвидија’ беше единствениот партнер што навистина го разгледувавме“, напиша Шомон.