Најголемото ИПО во Африка ги урна апликациите за тргување

Побарувачката за акции во компанијата „Данготе Петролеум“ (Dangote Petroleum Refinery and Petrochemicals FZE) преоптовари некои од бројните нигериски апликации за инвестирање, кратко откако во понеделникот започна првичната јавна понуда (ИПО).

Продажбата на акции на Нигериската берза во Лагос, комерцијалниот центар на земјата, е најголемата досега во Африка. Само неколку минути по официјалната објава, платформата „Бамбу“ (Bamboo“) на социјалната мрежа X соопшти дека работи на повторно оспособување на својата апликација. Портпарол на „Бамбу“ изјави за „Блумберг“ дека во текот на изминатата недела биле отворени 40 отсто повеќе сметки отколку во целиот месец мај, кој претходно важел за најдобриот месец во историјата на компанијата.

Компанијата „Кауривајс“ (Cowrywise), која го промовираше ИПО-то на социјалните мрежи, го помина утрото обидувајќи се да ја врати во функција својата услуга откако забележа „поголем сообраќај од вообичаеното“. Оваа финтек компанија на X објави дека услугата е повторно активна во 13:21 часот по локално време во Лагос.

Големиот интерес за стекнување удел во рафинеријата на Алико Данготе, најбогатиот човек во Африка, ја става на тест нигериската финтек инфраструктура. Милијардерот го отвора сопствеништвото на компанијата за јавноста, нудејќи акции по цена од 40 американски центи по акција и со минимална инвестиција од само 4 долари. Тој се обраќа кон обичните граѓани на Африка, вклучувајќи широк спектар на платформи, како што се финтек компании, мобилни оператори и банки.

Во проспектот за јавната понуда беа наведени повеќе од 50 инвестициски посредници. Компанијата очекува да собере најмалку 1,6 милијарди долари од понудата, која завршува на 13 октомври и ја проценува вредноста на бизнисот на речиси 50 милијарди долари. Рафинеријата, која започна со комерцијална работа во февруари 2024 година, е изградена со инвестиција од 20 милијарди долари и преработува 700.000 барели сурова нафта дневно.