НБС ја одзеде дозволата на „Алта банка“, „Алта банка“ Битола соопшти дека работи непречено

Извршниот одбор на Народната банка на Србија на седница одржана во саботата донесе одлука за одземање на дозволата за работа на „Алта банка“  од Белград, бидејќи банката, и покрај претходно преземените надзорни мерки, не успеала да ја стабилизира својата финансиска состојба и да ја подобри ликвидноста, додека во исто време растел ризикот дека нема да може да ги исполнува обврските кон клиентите.

Во соопштението на НБС се наведува дека Агенцијата за осигурување на депозити со решение на судот ќе биде именувана за стечаен управник.

Извршниот одбор констатирал дека на одземањето на дозволата му претходеле контролни активности насочени кон тоа банката да го зголеми нивото на ликвидност.

„Утврдено е дека во претходниот период финансиската состојба на банката значително се влошила, како и дека постои можност за дополнително влошување на финансиската состојба или ликвидноста на банката, а со тоа и загрозување на интересите на депонентите“, се наведува во соопштението објавено на веб-страницата на НБС.

Имајќи предвид дека биле исполнети условите за одземање на дозволата за работа на банката, во согласност со Законот за банките, Народната банка на Србија ја донела оваа одлука со цел да ги заштити интересите на депонентите и да ја зачува стабилноста на финансискиот систем.

Агенцијата за осигурување на депозити во рок од седум работни дена ќе овозможи исплата на осигурените износи и располагање со средствата на депонентите, во согласност со Законот за осигурување на депозити.

„Алта банка“ е дел од деловниот систем „Алта група“, кој е во целосна сопственост на бизнисменот Давор Мацура. Според податоците на НБС, „Алта група“ е единствен акционер на банката со 100 отсто од гласачките права, додека Мацура е единствен сопственик на „Алта група“.

Во последните години „Алта група“ го прошири своето работење надвор од банкарскиот сектор, опфаќајќи платежни услуги, менувачки работи, трговија и недвижности.

Еден од најголемите понови деловни потези на групацијата беше преземањето на малопродажниот бизнис на хрватска „Фортенова“ во Србија, кој ги опфаќа синџирите „Идеа“ „Рода“ и „Меркатор“. Со ова, деловниот систем на Мацура дополнително го прошири своето присуство на домашниот пазар, од финансиски услуги и банкарство кон секторот на малопродажба.

Се огласи „Алта банка“ од Битола - банката е ликвидна и продолжува со стабилно и непречено работење

„Алта банка“ од Битола се огласи по одземањето на дозволата за работа на „Алта банка“ во Србија. Српската банка од пред една година е сопственик на поранешната „Стопанска банка“ од Битола. Менаџментот во земјава соопшти дека банката е ликвидна и продолжува со стабилно и непречено работење

„Во контекст на најновите случувања поврзани со ‘Алта банка’ во Република Србија, ‘Алта банка’ од Битола ја информира јавноста дека банката е самостојно правно лице, регистрирано во Република Северна Македонија, кое работи согласно домашната законска регулатива и е под непосредна супервизија на Народната банка на Република Северна Македонија“, соопшти банката.

„Алта банка“ АД Битола е ликвидна и продолжува со редовно и непречено работење. Сите експозитури и банкомати функционираат нормално, а клиентите имаат непречен пристап до своите средства. Граѓаните можат слободно да располагаат со своите депозити, да подигнуваат готовина и да ги извршуваат сите банкарски трансакции, согласно вообичаените услови на работење, велат од банката.

Настаните поврзани со банката во Србија не значат автоматски промена на финансиската состојба или правниот статус на „Алта банка“ од  Битола.

Депозитите на физичките лица се осигурени преку Фондот за осигурување на депозити, согласно законските услови и лимити.

„Ги уверуваме нашите клиенти дека банката продолжува со редовно работење и исполнување на своите обврски. Нивните средства им се достапни и нема ограничувања во користењето на банкарските услуги надвор од вообичаените услови на работење“, соопшти банката.

Текстот е ажуриран со соопштението на „Алта банка“ од Битола