Корпоративниот сектор во 2021 година постепено го нормализираше работењето, пришто претпријатијата во значајна мера закрепнаа од последиците од пандемијата, соопшти Народната банка. Оттаму информираат дека нето-добивката на корпоративниот сектор се зголемила за 30,7 проценти по падот на добивката од 18,9 проценти во 2020 година.
„Видливо е и значително намалување на учеството на субјектите од корпоративниот сектор што работеле со загуба, коешто во 2021 година изнесува 32,7 проценти од вкупниот број на субјекти од корпоративниот сектор наспроти 43,6% во претходната година. Извештајот за корпоративниот сектор нотира умерено подобрување на оперативната ефикасност, со подобрена уредност во извршувањето на обврските и наплатата на побарувањата, што придонесе показателите за ликвидноста да се задржат на стабилно, но скромно ниво. Постепеното економско заздравување, придонесе кон подобрување на способноста за редовно намирување на долгот, пришто се зголеми покриеноста на каматните расходи и расходите за финансирање со добивката од редовни активности“, информираат од Народната банка.
Во 2021 година забрзал и растот на капиталот на корпоративниот сектор, што овозможило раст на должничкото финансирање, без позначително да се зголеми нивото на задолженост изразено како сооднос меѓу долгот и капиталот (финансиски левериџ) на корпоративниот сектор.
„Вкупниот долг на домашниот корпоративен сектор во 2021 година забележа раст од 9,9 проценти. Сепак, пост-пандемиското закрепнување на економската активност со подинамичен раст на бруто-домашниот производ овозможи стапката на задолженост на корпоративниот сектор на крајот од 2021 година да остане на релативно слично ниво како и во претходната година (68,5 проценти наспроти 68,7 проценти) и под изведениот праг на ранливост, но сепак упатува на потреба од претпазливо следење“, укажуваат од Народната банка.
Во текот на 2021 година се подобрил и пристапот на претпријатијата до банкарски кредити, пришто е зголемен бројот на компании што користат кредити од банкарскиот сектор за 8,1 проценти.
„Согласно со податоците од поднесените годишни сметки на корпоративниот сектор, во 2021 година банките имаат кредитна изложеност кон 37,5 проценти од вкупниот број активни субјекти. Во контекст на финансиската стабилност, главните ризици од овој сектор се поврзани со влошениот амбиент за работењето на домашниот корпоративен сектор, особено нагласен од почетокот на оваа година, под влијание на воениот конфликт во Украина кој дополнително ги продлабочи веќе присутните нерамнотежи на глобалниот пазар, придружени со раст на цените на енергенсите и на репроматеријалите и генерално засилување на инфлацијата во глобални рамки“, додаваат од НБМ.
.webp){kind=icon}
