„Интел“ (Intel Corp.) планира големо кратење на бројот на вработени, најверојатно за илјадници, за да ги намали трошоците и да се справи со намалениот пазар за персонални компјутери, според извори запознаени со ситуацијата.
Отпуштањата ќе бидат објавени веќе овој месец, односно компанијата планира да го направи чекорот во исто време со извештајот за заработката во третиот квартал на 27 октомври, посочуваат изворите, кои побарале да останат анонимни бидејќи станува збор за приватни сознанија. Производителот на чипови имал 113.700 вработени заклучно со јули.
Некои оддели, вклучително и групата за продажба и маркетинг на Intel, би можеле да доживеат намалувања кои ќе влијаат на околу 20 отсто од персоналот.
Прочитај повеќе
Пад на испораките на компјутери во светот четврти квартал по ред
Испораките на декстоп и лаптоп компјутери во светот се намалија за 19,5 отсто во третиот квартал годинава
11.10.2022
Intel се соочува со голем пад на побарувачката за процесори за компјутери, неговиот главен бизнис, и се бори да го врати уделот на пазарот изгубен од ривалите како AMD (Advanced Micro Devices Inc.). Во јули, компанијата предупреди дека продажбата во 2022 година ќе биде околу 11 милијарди долари помала од претходно очекуваното. Аналитичарите предвидуваат пад на приходите во третиот квартал од околу 15 отсто. Се намалија и некогаш завидните маржи на Intel: тие се за околу 15 процентни поени потесни од историските бројки од околу 60 отсто.
При извештајот за заработка во вториот квартал, Intel соопшти дека може да направи промени за да го подобри профитот. „Исто така, ги намалуваме основните трошоци во календарската 2022 година и ќе преземеме дополнителни активности во втората половина од годината“, рече тогаш главниот извршен директор, Пет Гелсингер.
Intel, со седиште во Санта Клара, Калифорнија, одби да коментира за отпуштањата.
Последниот голем бран отпуштања се случи во 2016 година, кога компанијата скрати околу 12.000 работни места, или 11 отсто од вкупниот број. Оттогаш, компанијата направи помали кратења и затвори неколку оддели, вклучувајќи ги и единиците за мобилни модеми и дронови. Како и многу компании во технолошката индустрија, Intel исто така ги замрзна вработувањата на почетокот на годинава, кога пазарните услови се влошија и стравувањата од рецесија се зголемија.
Најновите кратења веројатно ќе треба да ги намалат фиксните трошоци на Intel, можеби за околу 10 до 15 отсто, вели аналитичарот на Bloomberg Intelligence, Мандип Синг во истражувачка белешка. Тој проценува дека тие трошоци се најмалку 25 до 30 милијарди долари.
.webp){kind=icon}
