.webp){kind=icon}
„КБ Прво пензиско друштво АД Скопје“ се најде на листата на 1.000 топ пензиски фондови во Европа за 2022 година во новото издание на публикацијата „Investments&Pensions Europe – IPE“ (Инвестиции и пензиии Европа). Станува збор за продлабочена студија за европскиот пензиски пазар во вредност од 9 илјади милијарди евра, која ги рангира водечките институции по средства и нуди детални анализи за распределбата на средствата за најголемите фондови.
Со вкупни средства од 887.871.000 евра заклучно со 30 јуни, годинава „КБ Прво пензиско друштво АД Скопје“ го зазеде 985. место на листата од илјада субјекти од сите земји од Европа. Македонската компанија е рангирана повисоко од друштва од Германија, Британија, Норвешка, Швајцарија и други земји. На првото место на листата е „Norwаy Government Pension Fund Global“ со вкупни средства 1,1 илјада милијарди евра, што е двојно повеќе од второрангиранираниот „ABP“ од Холандија кој располага со средства од 530 милијарди евра.
На првите педесет места од листата доминираат пензиски фондови од Холандија, Британија, Германија, Швајцарија и од норидските земји. Од земјите од регионот, највисок пласман имаат хрватските „AZ Mandatory Pension Fund Category B“ (298. место) со вкупни средства од 5,8 милијарди евра и „Raiffeisen Mandatory Pension Fund“ (329.место) со вкупни средства од 5,2 милијарди евра заклучно со јуни, 2022 година.
Инаку, кога станува збор за за вкупните средства на сите пензиските фондови, убедливо на првото место на листата е Велика Британија со 2.309 илјади милијарди евра. Потоа, следуваат Холандија (1,6 илјади милијарди евра) и Норвешка (1,2 илијади милијарди евра).
Во анализата на IPE се вели дека европските пензиски фондови лани имале уште една силна година и раст на средствата што овозможило поголема распределба на капитал во компании и обврзници.
„КБ Прво пензиско друштво АД Скопје“ е основано и регистрирано во мај 2005 година, во согласност со Законот за трговски друштва и Законот за задолжително капитално финансирано пензиско осигурување. Компанијата работи во рамките на вториот и третиот столб на реформираниот пензиски систем односно со задолжителни и доброволни пензиски заштеди. На крајот на 2009 година „КБ Прво пензиско друштво“ започна со доброволното пензиско осигурување или учество во таканаречниот трет столб кој овозможува заштеда за пензии за компании и за поединци.
IPE е водечка европска публикација за институционални инвеститори и за оние кои управуваат со пензиски фондови што ја подготвува „IPE International Publishers Ltd“, компанија во независна сопственост основана во Британија во 1996 година.
