Американскиот алуминиумски гигант „Алкоа“ со значајни квартални загуби

Изненадувачката квартална загуба на американскиот економски лидер и алуминиумски гигант „Alcoa“ дополнително ја раздрма светската економија бидејќи металот, кој што се користи во голем број производи, од „iPhone“ до лименки „Pepsi“, се наоѓа на удар.

Цената на металот падна бидејќи централните банки ширум светот се борат против инфлацијата преку зголемување на каматните стапки. Европа се соочува со енергетска криза, додека кинеската економија се бори да заздрави. „Goldman Sachs Group“ смета дека до почетокот на 2023 година ќе дојде до уште поголем пад на цените на металите.

„Alcoa“ е меѓу првите светски металуршки гиганти кои што ги објавија кварталните финансиски резултати. Податоците на компанијата покажуваат загуба од 60 милиони долари во третиот квартал при значајно пониски цени, а зголемени трошоци за енергија и суровини.

Алуминиумот речиси ја преполови својата вредност, откако во март достигна рекорд кога руската инвазија врз Украина предизвика страв во врска со снабдувањето. Од тогаш кинеската криза со недвижнините и глобалното монетарно заострување влијаат врз цените на металите. Порастот на доларот, исто така, влијае врз цената на металите, правејќи ги поскапи за купувачите од странство.

Меѓународниот монетарен фонд (ММФ) неодамна ги намали своите прогнози за економскиот раст во светот. За следната година ММФ очекува 2,7 отсто светски економски раст, што е значајно намалување од претходно проектираните 3,8 отсто.

Акциите на „Alcoa“ вчера потонаа за повеќе од 6 проценти, а акциите во алуминиумскиот сектор во Азија утрово го следеа берзанскиот пад на американските производители.

„Goldman Sachs Group“ напомена дека мечкините движења ќе продолжат да влијаат на металуршкиот сектор не само во последниот квартал годинава, туку и во првиот од 2023 година.