Aмериканските технолошки акции паднаа во тргувањето по затворањето на берзата, откако некои од најголемите компании во индустријата објавија разочарувачки резултати, загрозувајќи ги облозите дека годинашната продажба од 5,5 илјади милијарди долари го достигна дното.
Кварталните извештаи од „Мајкрософт“ (Microsoft Corp.), „Алфабет“ (Alphabet Inc.) и „Тексас Инструментс“ (Texas Instruments Inc.) го истакнаа зголемениот притисок насекаде - од корпоративните ИТ буџети до трошоците за дигитални реклами и чиповите за индустриски машини. Фјучерсите на индексот Nasdaq 100 загубија дури 2,4 отсто, што е пресврт по добивката во вторникот, бидејќи резултатите повторно го насочија вниманието на инвеститорите на штетата врз заработката и економијата од брзото зголемување на каматните стапки од страна на Федералните резерви (ФЕД).
„Глобалната економија е во пресвртна точка“, вели Џесика Амир, стратег во Saxo Capital Markets. „Посилниот долар ќе продолжи да ги повредува приходите на бизнисите, во време кога побарувачката најверојатно ќе падне поради обратниот ефект на богатството што се очекува да ги зафати пазарите. Останува притисокот врз поризичните класи на средства како што е технологијата“, додава таа.
Фјучерсите на индексот Nasdaq 100 забележаа пресврт по разочарувачките извештаи / Bloomberg
Знаците на слабост се широко распространети. Microsoft го забележа својот најслаб квартален раст на продажбата во последните пет години, задушен од силниот долар, намалената побарувачка за компјутери и слабите приходи од рекламирање. Во најважниот финансиски мотор на Alphabet, пребарувањето и сродните бизниси, продажбата е пониска од проценките на аналитичарите бидејќи инфлацијата го намали растот на дигиталното рекламирање. Двете акции паднаа за повеќе од 6 отсто.
Распродажбата се прошири и на другите технолошки гиганти, при што Amazon падна за 4,9 отсто во доцното тргување. Оние кои остваруваат продажби од онлајн рекламирањето го следеа Alphabet, при што „Мета“ (Meta Platforms Inc.) и „Пинтерест“ (Pinterest Inc.) паднаа по повеќе од 4 отсто. Меѓу софтверските компании кои се движат по Microsoft, „Датадог“ (Datadog Inc.) падна за 7 отсто, „Сноуфлејк“ (Snowflake Inc.) падна за 5 отсто, а „Сејлсфорс“ (Salesforce Inc.) падна за 3 отсто.
Индексот Nasdaq 100 годинава падна за повеќе од 28 отсто, и е на пат кон најлошото годишно остварување по 2008 година.
Изгледите за побарувачката се особено страшни во индустријата за полупроводници, која беше еден од најжешките сектори за време на пандемијата. Texas Instruments, чии чипови се користат во сè, од домашни апарати до проектили, забележа пад на акциите откако слабите прогнози сигнализираа дека падот на чиповите се шири и во други бизниси, надвор од сферата на компјутерите и телефоните. Акциите загубија 5 отсто.
Јужнокорејскиот производител на чипови „СК хајникс“ (SK Hynix Inc.) објави пад на профитот од 60 отсто и најави дека ќе ги намали капиталните расходи за повеќе од половина. Предупреди на „невидено влошување на пазарните услови“. Hynix им се придружува на колегите производители „Микрон Технолоџи“ (Micron Technology Inc.) и „Киоксија“ (Kioxia Holdings Corp.) во намалувањето на плановите за производство, додека цените на чиповите паѓаат.
„Залихите соодветно ќе се намалат и побарувачката повторно ќе се зголеми“, прогнозира Грег Ро, шеф за технолошки истражувања во HMC Investment & Securities.
.webp){kind=icon}
Во моментов нема коментари за веста. Биди прв да коментира...