.webp){kind=icon}
Извршител го заплени уделот на „ЗК Пелагонија“ во биогасната електрана „Пелагонија енерџи“ поради наплата на побарувања. Налогот за заплена на уделот кој преставува 100-отсто од сопственоста на електраната е евидентиран во Централниот регистар.
„ЗК Пелагонија“ се обиде да ја продаде биогасната електрана во 2020 година. Всушност, стануваше збор за зделка со заинтересирана страна со оглед на тоа што купувач на „Пелагонија енерџи“ требаше да биде бугарската фирма „Тиор“ каде сопственици преку други фирми беа македонските бизнисмени Јордан Камчев и Цветан Панделески, кои посредно или директно се јавуваат и како акционери во „ЗК Пелагонија“.
Бугарската фирма требаше да плати 24 милиони евра за купување на уделот во „Пелагонија енерџи“. Според тогашните известувањата објавени од „ЗК Пелагонија“ преку Македонската берза, согласност за купопродажбата дале и Стопанска банка Скопје и НЛБ Банка кои преку извршители имаа запленето удели во биогасната електрана поради ненаплатени побарувања.
Според последниот консолидиран годишен извештај на „ЗК Пелагонија“ објавен на Македонската берза, заклучно со 2021 година биогасната електрана „Пелагонија енерџи“ е се уште во стопроцетна сопственост на комбинатот.
