Време е на објавување на кварталните извештаи заклучно со третото тримесечје годинава, а две многу интересни корпорации, кои се меѓусебни конкуренти и му припаѓаат на финтек-секторот (Financial technology), постигнаа различни резултати.
„Пејпал“ (PayPal Holdings, Inc., NASDAQ: PYPL) ги надмина очекувањата на финансиските аналитичари (Zacks Consensus) за 13,7 проценти. Тие објавија заработка по акција од 1,08 долар во третиот квартал од 2022 година, надминувајќи ги очекувањата, кои беа позиционирани на 0,95 долари по акција. Сепак, и покрај ова, акцијата го затвори денот на тргување со загуба од 1,79 отсто.
Остварената нето-добивка изнесува 6,85 милијарди долари, што е раст од 12 проценти во последната година. Бројката ја надмина процената (Закс консензус), според која очекуваната добивка беше 6,82 милијарди долари. Овие силни податоци за заработка укажуваат дека услугите за дигитални плаќања се во пораст и на крајот би можеле да доведат до закрепнување на пазарите на акции и криптовалути и до пресврт на трендот кон оптимизам.
Според прегледот на билансот на состојба на 30 октомври 2022 година, готовината и инвестициите на оваа компанија изнесуваат 10,8 милијарди долари, што е зголемување во однос на салдото на 30 јуни 2022 година од 9,3 милијарди долари. „Пејпал“ објави долгорочен долг од 10,24 милијарди долари на крајот на третиот квартал од оваа година, додека на крајот на претходниот квартал долгот беше 10,19 милијарди долари. Во последниот квартал тие создадоа 1,9 милијарда долари во готовина, што е значително зголемување од 1,5 милијарда долари во однос на претходниот квартал.
Bloomberg
Цената на акцијата на „Пејпал“ изгуби 57,9 отсто од почетокот на оваа календарска година, што е позначајно од падот на индексот S&P 500 од 21,1 отсто.
Bloomberg
Од друга страна, „Коинбејс“ (Coinbase), онлајн платформа за купување, продавање и чување и префрлување криптовалути, имаше загуба од 2,43 долари по акција. Приходите од тргување паднаа за 44 отсто во споредба со вториот квартал од 2022 година, на 365,9 милиони долари. Оваа дигитална менувачница има приходи од претплати и услуги од 210 милиони долари. По објавувањето на финансиските извештаи, акцијата го заврши денот со плус од 5,41 отсто, додека во последниот месец е во минус од 20 отсто. Загубите во третиот квартал од 2022 година беа малку помали отколку во вториот квартал, во кој паднаа многу значајни криптофирми, вклучувајќи ги „Целзиус“ (Celsius), „Војажер дигитал“ (Voyager Digital) и „Три ароус капитал“ (Three Arrows Capital).
За да се избори со овие пречки, компанијата воведе претплати и услуга за уплата што ги зголеми нејзините приходи во вториот квартал. Нивните акции пораснаа откако објавија партнерство со „Блекрок“ (BlackRock), најголемиот менаџер на средства во светот, за да им понуди на институционалните инвеститори изложеност на биткоин (Bitcoin).
Bloomberg
Корисничката база на „Коинбејс“ се намалува во текот на годината. Компанијата објави дека имала 8,5 милиони месечни трансакциски корисници (MTU) во текот на третиот квартал, што е намалување од 9 милиони во претходниот период, и 9,2 милиони во однос на првиот квартал. Аналитичарите на „Стрит акаунт“ (StreetAccount) очекуваа 7,84 милиони.
По своето деби на берзата минатата година, „Коинбејс“ ангажира персонал за да ги задоволи зголемената побарувачка на алатки за тргување со крипто и ентузијазмот околу новите монети. Но тоа целосно се промени оваа година, принудувајќи ја компанијата да го намали бројот на вработени. Во јуни, „Коинбејс“ објави дека намалува 18 проценти од своите работни места со полно работно време, што значеше дека дала околу 1.000 откази.
Севкупно, „Коинбејс“ објави приход од 576,4 милиони долари во третиот квартал, што е пад од 28 проценти во однос на вториот квартал, додека неговата нето-загуба се намали за 50 проценти, на 544,6 милиони долари.
Bloomberg
.webp){kind=icon}
