Маск со брзи казни за инженери од „Твитер“ кои јавно го прекорија

Сопственикот на „Твитер“ (Twitter), Илон Маск, кој себеси се нарече „апсолутист за слободен говор“, прибегна кон отпуштање на инженери од компанијата кои јавно го критикуваа на оваа социјална мрежа.

Во еден случај, Маск го објави отпуштањето преку твит. Во друг, поранешен вработен посочи дека добил отказ откако отворено го прекорил Маск.

Инженерот Ерик Фронхофер, кој работел на апликацијата на Twitter за оперативниот систем Android, во неделата споделил еден од твитовите на Маск со негов коментар, велејќи дека сфаќањата на Маск за техничкиот дел на апликацијата Twitter се „погрешни“. Маск одговори и побара од Фронхофер да елаборира, а потоа напиша: „Twitter е супер бавен на Android. Што направивте за да го поправите?“

Откако се обидел да го елаборира своето размислување во поголем број твитови, Фронхофер бил прашан од друг корисник зошто не ги споделил своите повратни информации приватно со својот нов шеф. Одговорот на инженерот, кој работел во Twitter повеќе од осум години, гласи: „Можеби треба и прашањата да ги поставува приватно. Преку Slack или е-пошта“.

Во понеделникот наутро Маск објавил дека Фронхофер е отпуштен. Фронхофер ја ретвитнал објавата и го употребил емотиконот со поздрав што многу вработени го користеа кога беа отпуштени на почетокот на месецов. Од Twitter, а и Фронхофер не одговориле веднаш на барањата за коментар за неговиот статус во фирмата.

Уште еден инженер, Бен Леиб, бил отпуштен откако го прекорил Маск. Тој ја ретвитнал истата техничка објава од Маск, пишувајќи: „Како поранешен технолошки лидер за тајмлајн инфраструктуратра на Twitter, можам отворено да кажам дека овој човек нема поим што зборува“. Леиб, кој работел во Twitter цела една декада, за Bloomberg потврдил дека бил отпуштен во неделата.

Twitter е во хаос откако Маск го презеде раководството кон крајот на минатиот месец. Многу работници се и натаму вознемирени поради тоа што Маск отпушти половина од нас 7.000 вработени во компанијата, вклучително и повеќето директори, во рок од само недела дена откако ја купи платформата за 44 милијарди долари.

Милијардерот брзо ја промени и корпоративната култура. Претходно, не беше вообичаено вработените јавно да спорат со директорите на компанијата, но пред Маск, работниците честопати своите приговори ги споделувале преку интерните канали на Slack или преку е-пошта.

Промените на Маск доведоа до недостаток на внатрешна комуникација, па работниците веќе не знаат кој е главен и кои се приоритетите на компанијата, велат сегашни и поранешни вработени.

Потезите, исто така, предизвикаа загриженост дека Twitter, чие седиште е во Сан Франциско, е ранлив на дефекти или технички прекини. Во понеделникот, Twitter повторно го замрзна кодирањето, прекинувајќи гo ажурирањeто на апликацијата, а на вработените не им било дадено јасно објаснување зошто.

Во моментов нема коментари за веста. Биди прв да коментира...

Остави коментар