Просечната оценка за деловната клима во Македонија е 5,4 на скала од еден до 10, покажуваат резултатите од истражувањето спроведено меѓу холандската деловна заедница во земјава.
„Падот на глобалната економија, нарушените синџири на снабдување, зголемената инфлација и високите цени на енергијата се зголемена загриженост за бизнисите, на кои им е тешко да го одржат работењето. Просечната оценка за деловната клима, на скала од еден до 10, е 5,4, додека средната стапка е многу слична на просечната и одговара на 5,5. Во споредба со резултатите од Бизнис-анкетата 2020 година има подобрување од 1,1 поен, или 20 проценти“, се вели во истражувањето.
Дури 71 отсто од испитаниците ги наведуваат релативно ниските оперативни трошоци како клучен фактор што влијае на нивната одлука да го прошират своето присуство. Истиот процент од испитаниците ги идентификува политичкиот ризик и нестабилноста како клучен фактор што може да влијае на нивната одлука да го намалат нивното деловно присуство.
Точно половина од испитаниците укажуваат дека нивото на образование и обука на локално ангажираниот кадар е главен проблем при водењето бизнис, по што следуваат корупцијата, пристапот до финансии и недостигот од достапен локален кадар.
„Иселувањето на квалификувани работници останува еден од најголемите предизвици на пазарот на трудот во оваа земја, бидејќи тоа од компаниите беше посочено како исклучително важна причина за недостиг од вештини“, се наведува во истражувањето „Холандскиот бизнис во Северна Македонија: предизвици и перспективи“, чии резултати вчера ги презентира холандскиот амбасадор во земјава Дирк Јан Хоп.
Прашалникот на анкетата го пополниле 14 компании, а целта на истражувањето е подобра поддршка на холандските бизниси во справувањето со предизвиците при водење бизнис во Македонија. Најголем дел од испитаниците е во секторот земјоделство/хортикултура, потоа ИКТ, производство, текстил, трговија и малопродажба. Најголем дел од компаниите, односно 60 проценти се мали и средни претпријатија, а 29 отсто се големи компании со повеќе од 100 вработени.
.webp){kind=icon}
