Климе Попоски е назначен за претседател на Управниот одбор на „Винер - Виена иншуренс груп“ АД Скопје. По предлог од Надзорниот одбор на „Виена иншуренс груп“ (ВИГ) од Виена, Австрија, и по добиена согласност од Агенцијата за супервизија на осигурувањето, Попоски ја презеде функцијата генерален директор на оваа осигурителна компанија.
Оттаму соопштуваат дека Попоски има долгогодишно искуство поврзано со осигурителниот сектор и дека објавил голем број научни и стручни трудови во реномирани научни списанија, а бил и предавач на признаени универзитети.
На позицијата генерален директор, Попоски дојде од функцијата советник за стратегиски прашања, а претходно беше и член на Надзорниот одбор.
„ВИГ (Vienna Insurance Group) е водечка осигурителна групација во Централна и Источна Европа, со присуство во 30 земји, и поседува над 50 друштва за осигурување. Наша цел е да бидеме првиот избор за нашите клиенти. Нашите осигуреници гледаат на нас како стабилен и доверлив партнер. Ние им овозможуваме на клиентите да живеат побезбеден и подобар живот. Оваа визија ни овозможува да ги испорачаме нашите ветувања и да придонесеме за нашата позиција како една од водечките компании на македонскиот осигурителен пазар“, изјави Попоски.
Тој вели дека главни приоритети во неговиот мандат ќе бидат да обезбеди осигурителни решенија за сите потреби на клиентите и со квалитетен и чесен деловен однос да се формира база на лојални корисници и на тој начин да се достигне лидерска позиција на осигурителниот пазар.
Попоски додава дека деловниот модел на компанијата ќе се заснова на мотивирани и високопрофилирани стручни лица, дигитализација на деловните процеси, силна капитална база, понуда на нови иновативни производи и посветеност кон корпоративна општествена одговорност.
.webp){kind=icon}
