„Шкода енијак купе“ (Skoda Enyaq Coupé), „фијат 500 е кабрио“ (Fiat 500e Cabrio), „БМВ и4“ (BMW i4) и „хјундаи кона електро“ (Hyundai Kona Elektro) се електричните автомобили со топ рејтинг според параметрите за оценување во новото истражување на германскиот автомобилски клуб АДАК (ADAC). Во истражувањето се земени предвид електрични автомобили од четири класи и се рангирани според перформансите, цената и критериумот вредност за пари.
Во истражувањето се вели дека силна страна на лидерот кај микроавтомобилите „фијат 500 е кабрио“ се задоволството при управувањето и добрата оцена кај параметарот вредност за пари. Како слабости на овој автомобил се наведени лимитираниот капацитет за возење со едно полнење (245 километри) и ограничениот простор за багаж (од минимални 170 до максимални 470 литри).
За „киа ниро ЕВ инспирејшн“ (Kia Niro EV inspiration), автомобил што се најде на првото место во ниската средна класа, на позитивната страна се истакнати високото ниво на безбедност, богатата опременост, просторноста и можноста да се извозат 470 километри со едно полнење. Како слабост е забележан капацитетот за товар.
Моделите од германските производители доминираат на врвот во средната класа, а на првото место се најде „шкода енијак купе“. Како силни страни на овој автомобил се посочени комфорот, безбедноста, перформансите при возење и други. На слабата страна е цената.
За „БМВ ИХ“, автомобил што е на првото место во високата средна класа, се вели дека главни атрибути се безбедноста, задоволството при возењето, комфорот и просторноста, како и можноста да се извозат 610 километри со едно полнење, а како слабост е наведена превисоката цена.
Кои автомобили поминуваат најголемо растојание со едно полнење?
Еден од најважните податоци за електричните автомобили е растојанието што можaт да го поминат со полна батерија. Продавачите или производителите ветуваат многу, но во пракса досегот е секогаш помал. Германскиот автомобилски клуб (ADAC) тестираше 56 електрични автомобили и измери колку километри поминуваат со едно полнење на батеријата. Мерењата се вршат како дел од ADAC Ecotest, кој сите возила мора да го поминат под стандардизирани услови.
На податоците додадовме официјални податоци за досегот според WLTP, глобално усогласена тест процедура која ја мери потрошувачката на гориво и растојанието. Разликата помеѓу бројките постигнати во тестот ADAC и податоците од WLTP за тестираните автомобили е во просек околу 20 проценти. Тестираните автомобили постигнаа добри 78 проценти од посочениот опсег на WLTP.
ADAC истакнува дека вредностите на потрошувачката и досегот постигнати во стандардизираниот тест може да се разликуваат во пракса. Тоа значи дека нема секогаш да ги достигнете бројките претставени со споменатите автомобили. Возењето по автопат или ниските температури може значително да го намалат растојанието, предупредуваат тие. Дури и ако монтирате велосипед на покривот или прикачите приколка на автомобилот, досегот на растојанието ќе се намали.
На врвот на листата по досегот со едно полнење на батеријата се најдоа BMW, Mercedes-Benz и Ford. На самиот врв владее BMW iX во верзијата со поголема батерија xDrive 50. Тоа е единствениот автомобил кој поминал повеќе од 600 километри на тестот. Автомобилите со големи батерии и ефикасна потрошувачка се рангирани на врвот (без поголеми изненадувања). Највисоките места ги заземаа автомобилите од највисоката ценовна класа. Во првите десет се и Ford Mustang Mach-E, Polestar 2, Kia EV6, Tesla Model X100D (верзија која повеќе не е достапна) и Hyundai Kona. Последниот со цена од 41.880 евра е и најприфатливиот автомобил во првите дваесет.
Со помош на Урош Божин
.webp){kind=icon}
