.webp){kind=icon}
Иако македонскиот пазар е мал, со околу два милиона активни претплатници во мобилната телефонија, генералниот директор на МТЕЛ, Марко Лопичиќ, е категоричен дека има простор за нов оператор.
„Првите резултати по еден месец покажуваат дека корисниците го препознаа МТЕЛ како член на групацијата 'Телеком Србија', односно како еден од најголемите регионални учесници на пазарот, па врз основа на тоа ни веруваат и го избираат МТЕЛ како оператор“, вели Лопичиќ, кој нагласува дека интересот на корисниците во овој краток период им дава за право да веруваат дека ќе ги остварат плановите да станат значаен играч.
Според него, трендовите за развој на мобилната мрежа во регионот овозможуваат простор за понуда на нови дигитални содржини за деловните корисници базирани на IOT (Internet of things) паметни решенија, а кај приватниот сегмент за дистрибуција на дигитални содржини.
„Влегувајќи на пазарот за мобилна телефонија, внимателно креиравме пакети за да бидеме конкурентни во класичната варијанта на припејд и постпејд-сегменти, но тоа што нè издвојува од другите и што освежување на македонскиот пазар се нашите дигитални сервиси, пред сè две апликации до кои нашите клиенти имаат пристап, а тоа се Балкан мјузик, апликација за популарна регионална музика, и апликацијата Мплеј ТВ, каде што во живо може да се следат многу регионални телевизии. Исто така апликацијата овозможува пристап до база на сериски и играни филмови во продукција на 'Телеком Србија'“.
Како што посочи Лопичиќ, апликацијата и натаму ќе се развива, со тоа што корисниците ќе имаат пристап до некои содржини пред тие да бидат достапни за пошироката публика.
Во однос на очекувањата, тој посочи дека планираат годинава да ја завршат со 12.000 корисници, а следната година таа бројка да ја зголемат за неколкупати.
