.webp){kind=icon}
Патниците во Лондон се борат со дополнителни одложувања и откажувања кои во некои случаи се полоши отколку кога железничките работници официјално штрајкуваа.
Железничарите од повеќе синдикати минатата недела штрајкуваа четири дена како дел од долготрајниот спор околу платите и предложените реформи на железничката мрежа.
И покрај тоа што не е планиран штрајк за оваа недела, работниците ја следат забраната за прекувремена работа, што според железничките компании е причината за значително намалените услуги.
Само еден воз пристигна на станицата Мерилебон пред 10 часот наутро денеска во споредба со 36 една недела порано. Минатата среда, во услови на раширени железнички штрајкови низ целата земја, четири воза запреа во Мерилебон, во близина на Риџентс Парк, пред 10 часот.
Само 38 возови пристигнаа во Ватерло, инаку најпрометниот терминал во Обединетото Кралство, пред 10 часот, во споредба со 120 една недела порано. Процентот на возови кои пристигнувале на време бил уште помал од минатата среда за време на штрајкот.
Некои приградски станици ќе бидат затворени помеѓу Божиќ и Нова Година - како што се Литл Кимбл и Монкс Ризборо во Чилтерн Хилс, област западно од Лондон популарна кај градските работници. Одредени станици во северозападен Лондон, исто така, ќе бидат затворени до 9 јануари.
„Иако не е штрајк, забраната за прекувремена работа го ограничува бројот на возови со кои можеме да возиме секој ден и моравме да донесеме некои тешки одлуки“, рече Стив Тајлер, директор за планирање во железничка компанија.
На Британците им е препорачано да патуваат на Бадник само „ако е апсолутно неопходно“ поради следната рунда официјални штрајкови на Националниот синдикат на железнички, поморски и транспортни работници кои започнуваат во сабота.
„Тврдењата дека нивната планирана штрајкувачка акција за време на празничниот период „не е насочена кон Божиќ“ би биле смешни доколку последиците не се толку болни“, рече извршниот директор на Нетворк Раил (Network Rail), Ендрју Хејнс.
Генералниот секретар на синдикатот, Мик Линч, минатата недела рече дека синдикланите активности за Божиќ не се насочени кон патниците.
