.webp){kind=icon}
„Амазон“ (Amazon.com Inc) отпушта повеќе од 18.000 вработени. Тоа е најголемото кратење на корпоративната работна сила во историјата на оваа компанија и претставува најнов знак дека падот на технолошката индустрија се продлабочува.
Главниот извршен директор Енди Џеси го објави вчера овој потег преку соопштение до вработените, велејќи дека го следи годишниот процес на планирање на компанијата. Отпуштањата, кои започнаа минатата година, претходно се очекуваше да погодат околу 10.000 луѓе. Кратењето на работните места е концентрирано во корпоративните кругови на фирмата, главно во малопродажниот оддел и функциите на секторот човечки ресурси што се однесуваат за регрутирање кадар.
„'Амазон' издржа неизвесни и тешки економски времиња во минатото, а така и ќе продолжиме. Овие промени ќе ни помогнат да ги продолжиме нашите долгорочни можности со посилна структура на трошоците“, рече извршниот директор.
Иако изгледите за отпуштања се наѕираа над „Амазон“ со месеци, уште кога компанијата призна дека вработила премногу луѓе за време на пандемијата, ова сугерира дека изгледите на компанијата се затемниле. „Амазон“ им се придружи на другите технолошки гиганти во големите кратења на работници. Претходно, во средата, „Сејлсфорс“ (Salesforce Inc) објави дека планира да отпушти околу 10 проценти од својата работна сила и да го намали својот имот во недвижности.
Број на вработени во „Амазон“ / Bloomberg
Инвеститорите на „Амазон“ реагираа позитивно на најновите напори за затегнување на ременот, обложувајќи се дека тоа може да го зајакне профитот на компанијата за е-трговија. Акциите се искачија речиси за два отсто во доцното вчерашно тргување, откако „Волстрит журнал“ (Wall Street Journal) прв објави за планот.
Отпуштањето18.000 работници би било најголемото намалување на работници досега за технолошките компании за време на моменталното забавување, но „Амазон“ има и многу повеќе работна сила од колегите во Силиконската долина. Имаше повеќе од 1,5 милион вработени до крајот на септември, што значи дека најновите намалувања ќе претставуваат нешто над еден отсто од работната сила. Во времето кога компанијата ги планираше своите кратења во ноември, портпаролот рече дека „Амазон“ има околу 350.000 корпоративни вработени низ светот.
Најголемиот светски онлајн трговец на мало го помина крајот на минатата година приспособувајќи се на наглото забавување на растот на е-трговијата, бидејќи купувачите се вратија на навиките од пред пандемијата. „Амазон“ го одложи отворањето на новиот магацин и го запре вработувањето во малопродажбата. Замрзнувањето на вработувањата прво се прошири на корпоративниот персонал на компанијата, а потоа почнаа отпуштањата.
Џеси ги елиминира или ги ограничи експерименталните и непрофитабилните бизниси, вклучувајќи ги и тимовите што работат на телездравствена услуга, роботи за испорака и уред за видеоповици за деца, како и други проекти.
Компанијата со седиште во Сиетл, исто така, се обидува да го усогласи вишокот капацитет со побарувачката. Еден од начините за да се постигне тоа вклучува обид да се продаде вишокот простор на товарните авиони, велат луѓе запознаени со ова прашање.
„Амазон“, компанијата што започна како онлајн книжарница, сега намалува делови од своето работење. Но продолжува да инвестира во своите рекламни бизниси и видеостриминг.
Првиот бран на отпуштања најтешко ја погоди групата за уреди и услуги од „Амазон“, која меѓу другите производи ги изработува дигиталниот асистент „Алекса“ (Alexa) и паметниот звучник „Ехо“ (Echo). Раководителот на секторот минатиот месец за „Блумберг“ изјави дека отпуштањата во единицата изнесувале помалку од 2.000 луѓе и дека „Амазон“ останува посветен на гласовниот асистент.
На некои регрутери и вработени во секторот за човечки ресурси на компанијата им беше понуден откуп. Извршниот директор им кажа на вработените во ноември дека ќе има повеќе отпуштања во 2023 година во неговите тимови за малопродажба и човечки ресурси.
Во вчерашниот допис до вработените, Џеси рече дека компанијата ќе обезбеди испратнини, преодни здравствени бенефиции и вработување на засегнатите работници. Тој исто така прекори еден од вработените за објавување на вестите, што очигледно се однесуваше на извештајот на „Волстрит журнал“. Компанијата планира да започне разговори за потезите со погодените вработени на 18 јануари.
„Компаниите што траат долго минуваат низ различни фази. Тие не се во режим на проширување на бројот на луѓе секоја година“, рече извршниот директор Џеси.
