.webp){kind=icon}
Десет години по основањето, српската компанија „Новелик“ (Novelic), која произведува сензори за системи за асистенција во моторните возила, доби нов мнозински сопственик. Индиската компанија „Сона Комстар“ (Sona BLW Precision Forgings Ltd.) објави соопштение во кое наведува дека за 40,5 милиони евра ќе купи 54 отсто од акциите во компанијата, основана во 2012 година од Дарко Тасовац, Вељко Михајловиќ и Веселин Бранковиќ.
„Основачите ќе задржат 46 отсто од акциите и ќе продолжат да ја водат компанијата“, соопшти индиската компанија, додавајќи дека се очекува купувањето да придонесе за растот на заработката по акција на „Сона Комстар“ во првите 12 месеци.
Според соопштението, индиската компанија споменатите 40,5 милиони евра ќе ги плати на три рати. По склучувањето на договорот ќе се исплатат 60 отсто од сумата, а уште по дваесет отсто ќе се исплаќаат по 12 месеци и 24 месеци.
Договорот се очекува да биде склучен до четвртиот квартал од 2023 година, а вкупната вредност на компанијата по трансакцијата се проценува на 75 милиони евра.
Novelic
„Преку преземањето на ’Новелик’, ’Сона Комстар’ започна да ја гради својата трета деловна вертикала за производство на напредни системи за помош на возачите (ADAS), а тоа со цел да одговори на барањата на новите трендови во автономизација и автоматизација на возилата“, се додава во соопштението.
Постојан раст
Компанијата „Новелик“ моментално вработува повеќе од 130 инженери, а композитната мерка на годишен раст (CAGR индикатор) во последните седум години е 50 отсто, се наведува на веб-страницата на српската компанија.
„’Новелик’ нуди силен потенцијал за раст на среден рок. Во 2022 година приходите на компанијата изнесуваа околу 9,3 милиони евра, а добивката по оданочување изнесуваше 2,5 милиони евра. Компанијата работи со добивка секоја година од нејзиното основање“, се наведува во соопштението на индиската фирма.
„Покрај нејзините технолошки вештини, ’Новелик’ е единствена во својот пристап кон профитабилноста и одржливиот раст. ’Новелик’ има ист пристап и гледишта во однос на парите, технологијата и растот како и ’Сона’“, рече извршниот директор на компанијата Вивек Викрам Синг.
Според податоците на веб-страницата „Новелик“, компанијата работи во Белград, Нови Сад и Ниш.
