„Топ емплојерс институт“ (Top Employers Institute ) од Амстердам, Холандија, објави глобална листа на топ работодавци, на која се најдоа и компании од регионот Адрија. Сертифицирани се вкупно 2.053 организации во 121 земја, а меѓу врвните работодавци се најдоа девет компании од Србија, пет од Словенија, четири од Хрватска и по две од Македонија и од Босна и Херцеговина.
Според критериумите наведени од институтот, и двете компании од Македонија што се сместија меѓу топ работодавците се од автомобилскиот сектор, а тоа се „Леар корпорејшн Македонија“ (Lear Corporation Macedonia Tetovo Trim Plant) и „Адиент Македонија“ (Adient Macedonia). Овие две компании се и меѓу топ работодавците во Србија.
Од Босна и Херцеговина најдобрите работодавци, според оваа листа, се „Хемофарм“ (Hemofarm group Bosnia and Herzegovina), која дејствува во областа на фармацијата, и „Молсон корс“ (Molson Coors BH), во делот на производи за широка потрошувачка, услуги, храна и пијалаци.
Од Србија на листата топ работодавци се најдоа девет компании. Во областа за производи за широка потрошувачка и услуги тоа се „Филип Морис“ (Philip Morris Services Beograd & Philip Morris Operations Niš) и „ЈТИ Србија“ (JTI Serbia). Во секторот за храна и пијалаци дел од листата се „Пепси“ (PepsiCo Serbia) и „Апатинска пивара“ (Apatinska pivara). Во автомобилскиот сектор топ работодавци во Србија, исто како и во Македонија, се „Леар корпорејшн“ (Lear Corporation Novi Sad) и „Адиент Србија“ (Adient Serbia).
Како и во Босна и Херцеговина, така и во Србија, меѓу најпосакуваните работодавци во фармацијата е „Хемофарм“. Во малопродажбата тоа е случај со „Лидл Србија“ (Lidl Srbija KD), додека во секторот финансии е „Уникредит банка“ (UniCredit Bank Serbia).
Што се однесува до Словенија, титулата топ работодавци ја заслужија пет компании, меѓу кои „Телеком Словенија“ (Telekom Slovenija) во секторот телекомуникации, како и „Лидл Словенија“ (Lidl Slovenija) во малопродажба. Тука се и „Новартис Словенија“ во секторот фармација, НЛБ (NLB) во банкарството, како и „ЈТИ Словенија“ (JTI Slovenija) кога станува збор за производи за широка потрошувачка и услуги.
И Хрватска има најпосакувани компании на листата, и тоа „Привредна банка Загреб“ (Privredna banka Zagreb), која дејствува во секторот финансиски услуги, „Кауфланд Хрватска“ (Kaufland Hrvatska) е најпосакуваната компанија за работа во малопродажбата, во секторот за производи за широка потрошувачка и услуги тоа е „ЈТИ Хрватска“ (JTI Croatia), а во секторот производи за широка потрошувачка, услуги, храна и пијалаци е „Загрепска пиварница“ (Zagrebačka pivovara).
„Топ емплојерс институт“ е глобален авторитет за препознавање бенефиции и погодности во работата, а програмата за сертифицирање им овозможува на компаниите да го проценат и подобрат работното опкружување.
„'Топ емплојерс институт’ сертифицира 2.053 организации во 121 земја или регион. Овие сертифицирани врвни работодавци позитивно влијаат на животот на девет милиони работници. Со 11 канцеларии низ светот, продолжуваме со раст на глобално ниво“, наведуваат од институтот.
Преку програмата за сертифицирање се проценуваат работните практики во компанијата по пат на независно ревидирање и на фактите втемелени во анкетата за најдобри практики со човечки ресурси, која покрива шест домени и 20 области во целиот спектар на човекови ресурси.
Дејвид Плинк, извршен директор на институтот, рече дека турбуленциите што влијаат на работната сила во последните неколку години наведоа многу организации да го преиспитаат начинот на кој пристапуваат кон динамичките примени на полето на работна сила.
„И покрај сите промени, сертифицираните топ работодавци продолжија да напредуваат за да ги задржат добрите работни практики“, рече Плинк.
.webp){kind=icon}
