Растот на продажбата на „Лореал“ (L'Oreal SA) ги надмина очекувањата во четвртиот квартал и покрај слабата деловна активност во Кина поради неодамнешниот нов бран на ковид, кој влијаеше на побарувачката за козметика.
Продажбата во последниот квартал од 2022 година се зголеми за 8,1 отсто споредено со истиот период една година претходно, се вели во денешното соопштение на француската компанија за убавина. Аналитичарите очекуваа експанзија од 6,8 проценти.
Стапката на раст беше забавена три последователни квартали, бидејќи инфлацијата и турбуленциите во Кина ја ограничуваат побарувачката за козметика. За Кина од „Лореал“ велат дека пазарот за убавина е очигледно погоден од ограничувањата на јавното здравје во земјата, опишувајќи ги условите како предизвикувачки за нејзините производи за широка потрошувачка. Исто така, од компанијата забележуваат драстично забавување на нивната луксузна единица таму. Строгите кинески заклучувања поврзани со ковид беа проследени со нагло укинување на ограничувањата. Тоа за возврат предизвика наплив на инфекции што ги задржаа потрошувачите и работниците дома во декември.
Споредливиот раст на продажбата од 4,9 проценти во Северна Азија беше најслаб меѓу регионите што ги следи „Лореал“. Инвеститорите ќе мора да го одмерат тоа забавување на „Лореал“, иако компанијата продолжува да ги надминува очекувањата на пазарот.
Овие резултати следуваат по песимистичкиот изглед на „Есте Лодер“ (Estée Lauder Cos) од минатата недела. Американскиот конкурент објави високо ниво резерви во продавниците во Кина и ја одложи својата прогноза за враќање на растот таму. Акциите на „Есте Лодер“ паднаа за околу 8,5 проценти откако компанијата ги објави своите резултати на 2 февруари.
Годишниот оперативен профит на „Лореал“ изнесува 7,46 милијарди евра (8,02 милијарди долари), што е над просечната процена на аналитичарите, кои очекуваа профит од 7,42 милијарди евра.
.webp){kind=icon}
