text size
Џереми Доиг, главен технолошки директор на услугите за стриминг на „Волт Дизни“ (Walt Disney Co), ја напушти компанијата, според интерната белешка што ја виде „Блумберг“, што претставува последно заминување од висок профил, додека главниот извршен директор Боб Ајгер ја реструктурира најголемата компанија за забава во светот.
Доиг му се придружи на „Дизни“ минатиот март, по долгогодишно работење во „Гугл“ (Google), и беше задолжен за технологија за „Дизни+“ (Disney+), „Хулу“ (Hulu) и ЕСПН+ (ESPN+). Арон Лаберж, кој работеше во „Дизни“ во изминатата деценија, сега ќе ги надгледува технологијата и производите за медиумските бизниси на компанијата.
„Информиран сум дека Џереми Доиг повеќе не е во компанијата“, напиша Мајк Ханли, виш потпретседател за инженерство во одделот за стриминг на „Дизни“, во белешка до колегите. Ханли ќе поднесе извештај до Лаберж. Ниту претставниците на „Дизни“,ниту Доиг не одговорија на барањата за коментар.
Заминувањето на Доиг доаѓа само неколку дена откако Ајгер објави дека „Дизни“ ќе отпушти 7.000 вработени и ќе имплементира нова корпоративна структура, таква што ќе го врати надзорот над стриминг-услугите на врвните креативни директори на компанијата. Потезите ги поттикнаа поручниците Алан Бергман и Дејна Волден, кои водат забава, како и шефот на ЕСПН, Џими Питаро, но им ја одзеде моќта на вработените како Ребека Кембел, раководителка на меѓународна содржина и операции, и Мајкл Пол, претходно претседател на „Дизни стриминг“.
„Дизни“ најави дека Кембел ќе замине на крајот на јуни, додека судбината на Пол е предмет на многу дебати во компанијата. Кога Бергман и Валден првично испратија белешка во која ја опишаа својата нова структура, тие не го спомнаа Пол, кој му се приклучи на „Дизни“ кога компанијата го купи „БАМ тех“ (BAMTech), лидер во технологијата за видеостриминг.
Ајгер ефективно го распушти „Дизни медија ентертејмент енд дистрибушн“ - ДМЕД (Disney Media Entertainment & Distribution), сектор што го создаде неговиот претходник Боб Чапек, за да ги надгледува услугите за стриминг. Шефот на ДМЕД, Карим Даниел, ја напушти компанијата минатиот ноември заедно со поранешниот извршен директор.
Последните најави оставија илјадници вработени во „Дизни“ без сигурност за нивната иднина во компанијата и како ќе функционираат нивните сектори. Повеќето од нив не знаат како ќе се распределат кратењата на работните места, иако многумина претпоставуваат дека најтешко ќе бидат погодени вработените во ДМЕД и, општо, секторот за забава. И додека програмирањето и маркетингот за трите примарни услуги за стриминг се поделени помеѓу два посебни оддела, вработените во технологијата мора да продолжат да работат на сите три.
Во меморандумот испратен до колегите, кој го виде и „Блумберг“, Лаберж рече дека изминативе 36 часа беа виор на настани откако „Дизни“ ги објави резултатите од првиот квартал, кои ги надминаа процените.
.webp){kind=icon}
