Данската компанија за накит „Пандора“ (Pandora A/S) понуди обврзница поврзана со одржливост, која вклучува цел да користи 100 проценти рециклирано сребро и злато до 2025 година.
Производителот на накит во петокот продаде деби-обврзница од 500 милиони евра, поврзана со одржливост, со рок на достасување од пет години, според лице запознаено со ова прашање, кое побара да остане анонимен извор, бидејќи нема овластување да зборува за тоа. Договорот вклучува три цели за изведба на одржливост, при што првите две се фокусирани на намалување на емисиите, додека третата специфицира целосна употреба на рециклирано злато и сребро во рок од две години.
Понудата на „Пандора“ беше дел од напорите да се олесни нејзиното потпирање на пазарот на банкарски заеми и да се диверзифицираат изворите на финансирање. „Компанијата ги достигна големината и силата каде што е природно да се добие добра рејтинг-оценка и да има повеќе извори на финансирање отколку само заеми“, рече главниот финансиски директор на компанијата Андерс Бојер во интервју неделава.
Приходите од продажбата ќе се користат за општи корпоративни цели, вклучувајќи и рефинансирање на постојниот долг, според изворот. Интересот за обврзницата од инвеститорите изнесуваше вкупно 2,1 милијарди евра. Посредници во издавањето беа Данске банк (Danske Bank A/S), Норси банк (Nordea Bank Abp), БНП Парибас (BNP Paribas SA) и Морган Стенли (Morgan Stanley).
„Пандора“ се проширува откако вети дека ќе отвори најмалку 100 нови продавници во 2023 година. Нејзините акции од почетокот на годината се зголемија речиси за 36 проценти поради силната заработка и плановите за откуп на акции.
.webp){kind=icon}
