Компанијата „Вирџин орбит холдингс“ (Virgin Orbit Holdings) поднесе барање за стечај по неуспешниот обид да го собере капиталот потребен за продолжување со работа.
Компанијата за лансирање сателити, поврзана со британскиот милијардер Ричард Бренсон, наведе имот од 243 милиони долари и 153,5 милиони долари вкупен долг во барањето за стечај поднесено во Делавер.
Стечајот е последниот чин во брзото пропаѓање на компанијата со седиште во Лонг Бич, Калифорнија, по големиот неуспех на лансирањето во јануари и падот на цената на акциите. Работата беше привремено прекината во март додека бараа дополнителен капитал, а потоа отпуштија 675 вработени.
Компанијата на Бренсон, „Вирџин инвестментс“ (Virgin Investments), обезбеди 31,6 милион долари за „Вирџин орбит“ да продолжи да работи додека бара купувач, а главниот извршен директор Ден Харт тогаш рече дека бара трансакција што добро ќе ги позиционира „Вирџин орбит“ и нејзините средства „за идни можности и мисии“.
Компанијата е дел од империјата на Бренсон, која ги вклучува „Вирџин Атлантик ервејс“ (Virgin Atlantic Airways) и компанијата за вселенски летови „Вирџин галактик“ (Virgin Galactic Holdings), и никогаш не остварила профит како јавна компанија.
Официјално започна со работа во 2017 година, како подружница на „Вирџин галактик“. Бизнисот на „Вирџин орбит“ беше фокусиран на лансирање мали сателити во орбитата. Успешно се лансирани 33 сателити, објави компанијата.
Воздушно лансирање
За разлика од некои конкуренти што лансираат ракети од земја, „Вирџин орбит“ користеше техника позната како воздушно лансирање, во која нејзината ракета „Лаунчер“ (LauncherOne) е поставена на голема височина под крилото на модифицираниот авион „боинг 747“. Компанијата започна да ја развива ракетата во „Вирџин галактик“ години пред официјално да го стартува бизнисот за лансирање сателити.
„Вирџин орбит“ успешно ја лансира својата прва мисија во орбитата во јануари 2021 година и заврши четири успешни летови до 2022 година.
Компанијата планираше годинава да ја зголеми фреквенцијата на лансирање, но мораше да ги ревидира плановите по неуспешната мисија во јануари, што ќе беше прво орбитално лансирање од британско тло. Нивната ракета не успеа да влезе во орбитата откако се појави проблем со филтерот за гориво во текот на летот, што резултира со губење на девет мали сателити.
.webp){kind=icon}