.webp){kind=icon}
„Хуавеј“ (Huawei Technologies Co.) разви софтвер за деловно управување со кој може да го замени „Оркл“ (Oracle Corp.), преземајќи уште еден чекор кон намалување на зависноста од американска технологија.
Производителот на телекомуникациска опрема, кој не може да користи американска технологија без лиценца, развива внатрешен софтвер и чипови за да ги отстрани негативните ефекти од тоа што фигурира на црната трговска листа на САД. Компанијата го замени системот за планирање ресурси (ERP) со решение над кое „има целосна контрола“, се наведува во соопштение од четвртокот.
Зависноста на „Хуавеј“ од „Оркл“ стана неодржлива кога фирмата со седиште во Остин, Тексас, престана да обезбедува софтверски надградби и технички услуги по трговското ограничување од страна на Вашингтон во 2019 година.
Нарекувајќи го „најобемниот и најкомплексен проект за трансформација што 'Хуавеј' некогаш го презел“, компанијата посветила три години и ангажирала илјадници вработени за да развие сопствен систем за претпријатието, познат како „Мета ЕРП“ (MetaERP). За ова придонеле и неколку локални партнери, вклучувајќи ги и фирмата за сајбер-безбедност „Ки Ан Џин“ (Qi An Xin Technology Group Inc.) и развивачите на софтвер „Кингди“ (Kingdee International Software Group Co.) и „Кингсофт“ (Kingsoft Corp.), рече директорот на „Хуавеј“, Тао Џингвен во посебна изјава.
„Хуавеј“ одби да коментира дали планира да го комерцијализира „Мета ЕРП“, кој моментално е наменет само за внатрешна употреба.
Замената е во согласност со желбата на Пекинг да ја отфрли зависноста од странски доставувачи и да развие самодоволност во клучните технологии. Кинескиот претседател Кси Џинпинг ѝ нареди на земјата да ја зголеми употребата на домашни опции за замена на странските технологии, ветувајќи повеќе финансии и даночни стимулации за клучните истражувачки институти.
„Хуавеј“ е сè погласен за напредокот што го прави во развојот на сопствени технологии. Минатиот месец висок извршен директор рече дека компанијата развила софтверски алатки способни да дизајнираат чипови до 14 нанометри, со што се приближува до целта за надминување на американските санкции.
