„Волт Дизни“ (Walt Disney Co.) денеска почна да им дели откази на вработени во тековниот обид на забавниот гигант да укине околу 7.000 работни места оваа година. Ова е втора од трите очекувани рунди на кратења на работните места, се вели во соопштението на „Дизни“.
Првото намалување на работната сила на „Дизни“, компанија што имаше околу 220.000 лица, се случи минатиот месец. Како што соопштија од компанијата, во рамките на оваа втора рунда, која ќе трае до четврток, треба да се одлучи за елиминирање на 4.000 работни позиции. Последните намалувања на работните места на „Дизни“, за што „Блумберг“ објави минатата недела, се дел од амбицијата на главниот извршен директор Боб Ајгер да заштеди 5,5 милијарди долари годишни трошоци.
Компанијата се обидува да ја намали својата посветеност на општа забава и да им даде приоритет на франшизите и добро препознатливите брендови. Во фокусот на актуелните откази е секторот „Дизни ентертејнмент“ (Disney Entertainment), во кој се сместени филмски и ТВ-компании што не се поврзани со спорт.
Откази ќе има во сите сектори на компанијата, од нејзиното седиште во Калифорнија до Конектикат, каде што се наоѓа нејзината спортска мрежа ЕСПН (ESPN). Овие одлуки нема да ги опфатат работниците што работат и се платени по час во тематските паркови, соопшти компанијата.
Третиот круг на откази треба да дојде пред почетокот на летото. „Дизни“ се бори да ги намали загубите на својата водечка услуга за стриминг „Дизни+“, која дебитираше во 2019 година. Оттогаш, вниманието на Волстрит се префрли од растот на бројот на претплатници кон неверојатните трошоци за работа во рамките на онлајн видеоплатформите.
Ајгер се врати на чело на „Дизни“ во ноември, откако компанијата објави квартална загуба од 1,47 милијарда долари во својот стриминг-сектор, кој вклучува удели и во производите на „Хулу“ (Hulu) и ЕСПН+ (ESPN+).
.webp){kind=icon}
